Реал Мадрид против Ливерпул нема да биде пресметка само на два европски гиганта за трофејот во фудбалската Лига на шампиони туку и директен дуел на неверојаните Кристијано Роналдо (33) и Мохамед Салах (26) кои оваа сезона постигнаа по 44 гола во сите натпреварувања во кои настапија за „кралевите“, односно, „црвените“ од „Енфилд“. Финалето за крај на клупската сезона на стариот континент е вечерва со почеток во 20.45 часот на Олимпискиот стадион во Киев, правдата му е доверена на српскиот арбитар Милорад Мажиќ.
„За мене ќе биде еден вид на остварување на сонот доколку успеам по петти пат да го освојам пехарот. Ливерпул е одлична екипа што многу ме потсетува на нас од пред неколку сезони кога игравме со тројца брзи играчи во напад. Штом ќе играат во финале, значи имаат квалитет. Имам респект кон нив, но мислам дека ние сме подобри. Можеме да испишеме историја пришто искуството што го имаме ќе биде наш голем адут“, порачува Роналдо чиј Реал ќе се обиде по 13 пат да стане европски првак.
Португалецот, сепак, порачува дека на финалето не гледа како натпревар меѓу него и репрезентативецот на Египет туку посакува Реал да ја одбрани титулата.
„Поинаков сум од останатите. Како и Салах кој најмногу ја користи левата нога и понизок е од мене. Јас повеќе играм со десна и многу повеќе можам да играм со глава. Тотално сме различни. Тој има фантастична сезона меѓутоа финале во Лига на шампиони е нешто поразлично“.
За Ливерпул, пак, вечерашното финале ќе биде прво по епското во 2005 година во Истанбул. „Црвените“ тогаш ја испуштија титулата во дуелот со Милан. На полувреме заминаа со големи 3:0 за калчолигашот да ворати со идентична мерка во вториот дел и подоцна да слави на пенали.
„Реал е поискусен во вакви натпревари. Исклучително добри се како група. Со истиот тим победуваат во изминатите две години, но фудбал е, сепак, и ние имаме свои сметки, свои адути и гледаме свои шанси. Психолошки сме стабилни, силни. Направивме многу добри работи во оваа сезона и сите во екипата знаат дека можат да се потпрат еден на друг. Имаме неверојатна желба за радост во Киев и верувам дека ќе биде доволно вечерва“, нагласи менаџерот на Ливерпул, Јирген Клоп.
Ливерпул е единствена англиска екипа што успеала да победи против Реал Мадрид во финале на натпреварување на УЕФА. „Црвените“ во тоа успеаја во далечната 1981 година кога во тогашниот Куп на европски шампиони (КЕШ) славеа со 1:0.