Шкендија е нов сопственик на пехарот во фудбалскиот Куп на Македонија. Тетовци во финалето во Струмица го совладаа Пелистер со 3:0 за втор триумф во натпреварувањето, за одмазда за ланскиот пораз на пенали од битолчани, но и за прва двојна круна во клупската историја. Два погодока за „црвено-црните“ на стадионот „Младост“ вечерва постигна Висар Муслиу во 20. минута и во 72. минута, во меѓувреме (52. минута) во листата на стрелци се впиша и Бесарт Ибраими.

За Шкендија ова беше петто Куп финале како и за Пелистер и втора титула. Премиерната ја освоија во сезоната 2015/16 по победата над Работнички со 2:0 по претходните порази од Македонија Ѓорче Петров со 2:3 (сезона 2005/06), од Тетекс на пенали 5:6 и на идентичен начин во минатата сезона од битолчани со 3:4. Петто финале одиграа и пелистерци кои остануваат на двата трофеја освоени против Слога Југомагнат со 2:1 (сезона 2000/01) и против Шкендија лани.