Челзи по вторпат е победник во Лига Европа, по 2013 година и триумфот над Бенфика во Амстердам, или петти вкупно во натпреварувањата на УЕФА. Лондонските „сини“ вечерва во финалето во Баку го совладаа Арсенал со 4:1. Два гола за екипата од „Стемфорд Бриџ“ постигна Еден Азар, по еднаш Петр Чех го совладаа и Оливие Жиру и Педро, почесниот за „топчиите“ беше дело на Ивоби. Сите пет гола беа постигнати во второто полувреме.
За Маурисио Сари ова е прв трофеј во тренерската кариера во која има 810 натпревари. Но, финалето во ЛЕ можеби беше негов последен на клупата на Челзи по гласините дека во летниот преоден рок ќе замине од клубот и ќе го наследи Масимилијано Алегри на кормилото на Јувентус. Неговиот колега на спротивната страна, Унаи Емери го доживеа првиот пораз во мечевите за трофејот во ЛЕ по трите освоени со Севилја.
https://www.youtube.com/watch?v=ZKT2MUq_LXs
Настапот на Олимпискиот стадион во Азербејџан е можеби последен и за Еден Азар во синиот дрес на лондончани со оглед на големиот интерес за Белгиецот од Реал Мадрид. „Кралевите“ беа подготвени за комплетирање на трансферот за 100 милиони евра меѓутоа премиерлигашот одеднаш ја зголеми цената за 30 милиони, а вечерва наводно е направен компромис и двата клуба се нашле на средина (115 милиони евра) за услугите на двојниот стрелец за Челзи во Баку.
Она што е извесно е дека финалето во ЛЕ е последен натпревар за голманот Петр Чех. Чешкиот интернационалец од претходно најави дека ја завршува кариерата на крајот на сезоната.
Арсенал, пак, останува на последниот европски трофеј од сезоната 1993/94 во која триумфира во поранешниот КПК. Поразот од Челзи вечерва значи дека останува и без место во Лигата на шампиони за наредната сезона и повторно ќе биде дел од Лига Европа.
Во сабота на стадионот „Ванда Метрополитано“ во Мадрид ќе играат Ливерпул и Тотенхем за трофејот во Лигата на шампиони.