Рома е пред нова потера по три гола минус во фудбалската Лига на шампиони. Закажана е за наредната среда (20.45 ч.) на стадионот „Олимпико“ во кој пред две недели падна големата Барселона во четвртфиналниот реванш. Пленот што „волчицата“ ќе го демне на римското „ловиште“ е Ливерпул во меч чиј влог е финале. Калчолигашот избегна дебакл на „Енфилд“ со два гола за само четири минути во финишот на средбата откако прими пет од Мохамед Салах и компанија и одржа каква-таква надеж дека би можел до уште една сензација.
„Ќе се држиме до она што го направивме во четврт-финалето. Се е можно. Наша обврска ќе биде да се обидеме, пред се, за луѓето кои ја сакаат Рома. Единствената разлика од искуството со Барселона е што несреќно го загубивме првиот меч“, рече Даниеле де Роси, капитен на римјаните, за „Спорт Медиасет“.
Искусниот фудбалер за врска признава дека Рома тотално ја снема на „Енфилд“ на половина час што резултира со пет сурови казни од „црвените“ што, дотолку, не беше случај на „Камп Ноу“.
„Тотално бевме на „црна линија“, но, сепак, остануваме на три гола. Ливерпул е на исто ниво како и Барселона и верувам дека можеме да направиме нешто што веќе сме успеале да направиме“, додаде Де Роси.
Верба за Киев е присутна и кај неговиот соиграч и заменик капитен, Алесандро Флоренци, кој истакна дека Рома, колку-толку, се извлече во Ливерпул.
„Половина час бевме изгубени, речиси мртви, но не нè убија. Со срце и гордост успеавме барем пристојно да го завршиме натпреварот. Ќе биде тешко во реваншот меѓутоа ќе сториме максимум за анулирање на негативата. Нè очекува потешка задача одошто беше случај против Барселона, но ќе пуштиме крв на дресовите за да играме финале“, порачува Флоренци.
Возвратниот меч меѓу Рома и Ливерпул е на 2 мај во Рим. Премиерлигашот има 5:2 од првата средба на „Енфилд“.