Венус Вилијамс ќе влезе во јубилејното 20. учество на Вимблдон со приватна тужба во САД. Американската тенисерка се товари за предизвикување на сообраќајна несреќа со смртни последици на Флорида. Настанот се случил на почетокот на јуни и долго време беше држен далеку од очите на јавноста. Полицијата три недели водеше истрага и на крајот ја прогласи за виновна сопственичката на 23 гренслем титули (7 во поединечна конкуренција, 14 во женски двојки и две во мешани двојки).

И покрај најавите на нејзиниот адвокатски тим дека ќе нема судска разврска, сепак, семејстото на 78 годишниот Жером Берсон реши да ја гони повозрасната од сестрите Вилијамс. Очевидци на несреќата тврдат дека тенисерката влегла во раскрсницата на црвено и се судри во автомобил со брачна двојка пензионери. Мажот, инаку совозач во моментот на судирот, се здоби со скршеница на ‘рбетниот столб и внатрешно крварење, повреди на кои им подлегна по две недели во болница.

Според извештајот, возилото со кое управувала сопругата на сега починатиот Жером Берсон, Линда се удрила во џипот на Венус Вилијамс. Притоа се здобила со лесни телесни повреди, а 37 годишната тенисерката, која не била под никакво дејство, минала без гребнатинка.

Линда Берсон пред инспекторите рекла дека имала зелено светло додека се приближувала до раскрсницата и не можела да реагира на време. И Венус истакна дека во раскрсницата влегла со зелено светло, но и дека морала да запре на средина поради автомобил пред неа без да забележи дека е во правец на движење на автомобилот на Берсонови од страничната позиција.