„Горд сум на фактот дека овој Ден беше востановен во 2019 година на моја иницијатива, како претседател на Владата на Република Северна Македонија, и веќе петта година, 5 Мај се слави како Ден на македонскиот јазик“, порача на Фејсбук поранешниот премиер Зоран Заев по повод денешниот ден.
„Денот е избран во чест на Решението на Народната влада на Федерална Македонија која, на 5 мај 1945 година, ја усвои азбуката на македонскиот јазик како официјално писмо, а по два месеци Министерството за просвета го озакони првиот правопис, со што беше кодифициран македонскиот јазик“, вели тој.
Заев подвлече и дека Фондацијата „Заев – Едно општество за сите“, го одбележува овогодинешниот Ден на македонскиот јазик на начин кој соодветствува со своите стремежи и програмски определби.
„Врз основа на претходно потпишан Меморандум за соработка со Институтот за македонски јазик „Крсте Мисирков“, нашата фондација ја има улогата на поддржувач на јубилејна активност на оваа институција. Институтот за македонски јазик „Крсте Мисирков“, по повод 70-годишнината од своето постоење, распиша конкурс за есеј, на теми: „Јазикот наш денешен“ (за ученици од основните и средните училишта) и „Што направивме и што треба да направиме за македонскиот јазик“ (за студенти). Нашата фондација обезбеди парични награди за авторите на трите најдобри есеи од секоја категорија“, информираше поранешниот премиер.