Published: Monday, December 27, 2021 18:41
Современо опремен и целосно реновиран по сите европски стандарди e ургентниот центар во Специјалната болница за гинекологија и акушерство во Чаир, напиша министерот за здравство, Венко Филипче на неговиот Фејсбук профил.
Целосно се реновирани операционите сали, делот за интензивна нега, воведен е современ мониторинг за жените кои се породуваат. Целосно се реновирани амбулантите и опремени со нова опрема. Значително го зголемивме степенот на квалитет што се дава во интензивната нега на новородените. Со сето ова, нивото на опременост на болницата се подигна на втор-а степен, нагласува Филипче.
Филипче порача дека е обновена и пералната на болницата, а потсети дека објектот е целосно гасифициран.
„Во севкупниот план за унапредување на болницата за гинекологија и акушерство во Чаир се вклучени инвестиции од Министерството за здравство во изминатите четири години, како и поддршката од донаторите – Агенцијата ТИКА, ПРОЕКТ ХОУП и компанијата Алма М, за што искрено им се заблагодарувам. Сега оваа болница е налик на секоја европска, напредна и современа здравствена установа, а со експертизата на докторите континуирано ќе дава солидна и современа здравствена заштита за родилките и бебињата, наведе Филипче.