САД, Велика Британија и Франција презентираа синоќа драфт Резолуција во Обединетите Нации со која се осудува нападот со хемиско оружје во Сирија и бараат итна и брза истрага.
Агенцијата АФП, која го видела нацртот на Резолуцијата, пишува дека трите земји бараат од Организацијата за забрана на хемиско оружје итно да излезе до заклучок за овој напад.
Трите земји најавија дека денес ќе побараат оваа Резолуција да биде изгласана на сесијата на ОН во Њујорк. Но, Русија досега не го кажа својот став по ова прашање.
Целта на истрагата е да се утврди кој е креатор на овој напад со хемиско оружје, а нацртот на Резолуцијата бара од Сирија да ги покаже сите планови на нејзините воени авиони и воени операции во текот на нападот. Текстот на нацрт Резолуцијата има заканува за воведување на санкции според поглавието 7 на Повелбата на ОН.
Во февруари, претходното барањето за санкции врз Сирија беше блокирано од Кина и Русија. Дамас беше обвинет дека во 2014 година и 2015 година извршил исто така хемиски напад врз сириските села.
Сириската армија вчера демантираше било каков напад со хемиско оружје како и секогаш досега од почетокот на војната во 2011 година.
Според британскиот амбасадор во ОН Метју Рејкрофт, станува збор за воено злостроство и побара од Русија и Кина да не ставаат вето и “да не го бранат неодбранливото”.
Американскиот државен секретар Рекс Тилерсон предупреди дека претседателот Асад мора да каже што точно се случило, а францускиот претседател Франсоа Оланд изјави дека “сирискиот режим повторно ќе ја негира својата одговорност во овој масакр”.
Видео снимките на сириската опозиција покажуваа ужасни слики на страдањата на жртвите, мртви тела по улиците и лица во грчеви и пена на устата кои се борат за воздух.
Во нападот загинале најмалку 65 лица, а голем дел од нив се жени и деца.