Министерот за надворешни работи Бујар Османи денес се наоѓа во Украина. Како што објави на социјалните мрежи тој таму досега ги посети градовите Бородјанка и Киев. „Денес го посетив градот Бородјанка во киевската област кој е силно погоден од воените дејствија. Пустошот предизвикан од воената агресија врз Украина длабоко ме потресува. Уништувањето на виталната инфраструктура и страдањето на украинскиот народ мора да запре“, порача тој.
Министерот нагласи дека е потребна итна акција за да се стави крај на ова безумие и да се обезбеди помош за оние на кои им е потребна. „Страдањето мора да престане, а потоа да ги обновиме овие уништени области“.
Османи подвлече и дека посетата е во својство на претседавач со ОБСЕ, функција која Македонија ја презеде од 1 јануари.
„Тукушто пристигнавме во Киев, прва работна посета во рамки на претседавањето со ОБСЕ“, порача утрово преку Фејсбук шефот на македонската дипломатија.
„Ќе одиме на терен да ги посетиме областите погодени од воените дејствија и директно да се сретнеме со луѓето на терен. Ќе оствариме и бројни средби со високите државните претставници на Украина. Состојбата во Украина, со посебен фокус кон луѓето на терен – еден од главните приоритети на македонското претседавање со ОБСЕ“, рече тој.
