Францускиот министер за внатрешни работи, Кристоф Кастанер побара од префектурите во земјата решително да ги применуваат одредбите од новиот закон за азил што стапи во сила на 1 јануари, со цел да се забрза екстрација на лицата на кои им е одбиено барањето за азил.
Во писмо испратено до префектите и до раководителите на полицијата и на националната жандармерија, Кастанер потсетува дека новиот закон ги заострува условите за стекнување на право за останување на територијата на Франција за некои баратели на азил, особено за оние што доаѓаат од безбедни земји на потекло.
„За оние што се одбиени, мора да ја преземете обврската да ја напуштат територијата на Франција согласно одлуката на ОФПРА, француско Биро за заштита на бегалци и лица без државјанство, наведува Кастанер во писмото.
Тој во писмото потсетува на различните аспекти на законот и бара примена на одредби што „претставуваат главен елемент на реформата, како домашниот притвор или задржување во специјалните центри за засегнатите лица“.
Новиот закон овозможува продолжување на максималната должина на мерката притвор за одбиените баратели на азил на 90 дена, наместо досегашните 45, со цел да се обезбедат потребните документи за екстрадиција на овие лица во земјата од која потекнуваат.
„Вашата вклученост во ова е суштински услов за успех на реформата“, се наведува во писмото.
Досега, ако одбиениот барател на азил поднесеше жалба на решението до Националниот суд за баратели на азил, постапката за негова екстрација се одлагаше до завршување на процесот. Но, со новиот закон, за да запре процесот на екстрадиција одбиениот азилант мора да отпочне посложена судска постапка пред Управниот суд, кој сега е надлежен за одлагање на протерувањето. Оваа измена наиде на силни критики од страна на здруженијата за заштита на странците.
Новата законска мерка се однесува и на македонските државјани кои бараат азил во Франција, исто како и за граѓаните на сите држави од Балканот, бидејќи тие, како и Македонија, се сметаат за „безбедни земји“.
Албанците најбројни баратели на азил, Македонија на трето место
Во 2017 година, албанските државјани, со вкупно 7.633 барања, беа најбројни Европејци кои аплицираа за азил во Франција.
Во исто време, Македонија со 595 апликации за азил е трета на листата на европските земји чии државјани барале азил во Фрација. Ако на ова се додадат и 445 малолетни апликанти од Македонија, вкупната бројка на македонски државјани кои побарале азил во Франција во 2017 година изнесува 1.118. Од сите баратели на азил од Македонија во 2017 година, дозвола за останување во Франција добиле само пет жени.
Барањата на азил на државјаните од Македонија се разгледуваат во скратена постапка и со новите законски измени, таа постапка ќе биде уште побрза од досегашната.