Француската полиција употреби солзавец на демонстрациите против анти-ковид рестриктивните мерки во центарот на Париз. Во Париз се одржуваат неколку протести против воведување санитарни пропусници во Франција.
На еден од митинзите, полицијата употреби солзавец откако толпата почна да провоцира полицајци. Демонстрантите скандираа „Слобода! и фрлаа шишиња кон полицијата. Тие, исто така, извикуваа пароли „Диктатор – во затвор!“, „Макрон, не ни треба твојата пропусница!“
Како што објави претставникот на француската влада Габриел Атал, санитарните пропусници ќе започнат да функционираат на 9 август.
На 12 јули, францускиот претседател Емануел Макрон најави серија нови рестриктивни мерки за ограничување на ширењето на Ковид-19. Меѓу другото, тој најави продолжување на практиката за користење санитарни пропусници, со кои се докажува вакцинација или негативен резултат од тестот за Ковид-19, особено во барови, ресторани, возови на долги релации и авиони. Шефот на Француската Република, исто така, најави воведување на задолжителна вакцинација за лекарите во Франција и сите оние кои работат во болници и домови за стари лица. По изјавите на претседателот на Франција, соодветниот предлог -закон беше подготвен и усвоен од францускиот парламент.