Професорот Љубомир Фрчкоски во Отворено Студио на 1ТВ ја анализира идеолошката позадина на изборните слогани на претседателските кандидати. Тема на разговор беше и Договорот од Преспа, неговото евентуално ревидирање, како и причините за заложбата за широка владина коалиција до приемот во ЕУ. Според него, идејата за надпартиски кандидат е сомнителна демократска идеја.
„Тие се интересни ако ги анализирате. Блерим Река има интересна парола која е граѓанска. Го избегнува терминот „Македонија“ и со тоа дава шанса сите да се еднакви, парола што би одговарала на Силјановска од 1992 година кога беше либералка. Втората парола на Силајновска Давкова е отворено националистичка, во принцип една милитаристичка парола во која индивидуата треба да е жртва на повисоките вредности на државата. Не знам во случајов во која одбрана повикува. Пендаровски е блед во првото соочување. Слоганот е неутрален во основа, не е „комуњарски“. Има граѓански аспект. Не е впечатлив, но е најнеутрален и најпригоден“, рече Фрчкоски.
Во однос на соочувањето на кандидатите за претседател, Фрчкоски смета дека е потребно тие да ги искажат своите ставови јасно, а потоа да полемизираат со противникот.
„Не можев да го гледам целото соочување, бидејќи се изнервирав од манипулациите на кандидатите. Беше интересно како ќе се снајдат. Река силно ја изложи својата концепција. Силјановска беше голем манипулатор, притоа неискреноста и свесното лажење за тоа што ќе направи на неколку поенти, помина како жртва на Македонецот кој се бори против неправдата, со ветување дека ќе го поништи Договорот и дека ќе го врати името. Изгледа скандалозно, лажно и невозможно. Во таа смисла да ветиш нешто, а да знаеш дека не можеш ништо е манипулација. Пендаровски беше импресиониран од својата постара колешка и имаше една тактика да поставува прашања кои неа треба да ја стават во незгодна ситуација. Кандидатот треба да ги каже своите ставови јасно и цврсто, а потоа да полемизира со слабостите на противникот“, смета Фрчкоски кој беше кандидат за претседатрел на изборите во 2009 година.
Него, како што рече, посебно го нервира одбивниот став кон Преспанскиот договор.
„Мислам дека е неприфатливо од Пендаровски да го третира Договорот во насока дека не можеше подобро. Тоа е губитнички став. Тој е одличен договор кој може да го продавате како формула на решавање на спорови. Ако ги прашате вмровците каков подобар договор би направиле, тие немаат одговор, туку дека не би правеле договор. Тоа не е договор. Ги слушавме на телефон како се договараат, тоа беше пазар. Договорот ваков-каков што е ни ги решава проблемите кај афирмација на јазикот и националноста, која претходно не се договарала. Тој е маестрано направен. Кај името е посебен скандал. Ние сме биле и народна и федеративна, тоа не го менува карактерот на нацијата. Потребно е тој да се афирмира“, коментира професорот.
Неделава во фокус беше средбата Заев – Ципрас во Скопје. Фрчкоски истакна дека со право се нарекува историска средба и дека оваа информација беше пренесена од сите релевантни светски медиуми. Според него темата за поништување на Договорот од Преспа е апсурдна, а претседателот на државата не може ништо да направи во оваа насока.
„Темата е апсурдна, фрлан на маса поради ноќните соништа на вмровците и нивната реторика, со која се обидуваат со се за да нема реперкусии по изборите. Тема би била овој Договор да го продадеме како модел на решавање со дипломатски средства, како тој договор би бил основа за Нобелова награда. Претседателот на државата не може ништо да направи за негово поништување“, заклучи Фрчкоски.