Пратеничката Фросина Ременски денеска во Основното јавно обвинителство за гонење организиран криминал врши увид во доказниот материјал во врска со случајот со невладината организација „Меѓународен сојуз“ во кој се опфатени пет физички лица и едно правно лице. Во име на првоосомничениот Бојан Јовановски – Боки 13, кој беше претседател на „Меѓународниот сојуз“, увид извршил неговиот адвокат Сашо Дуковски. Покана за увид во доказниот материјал од страна на Обвинителството е испратена и до Миле Јовановски, таткото на Боки 13, а вчера тоа го направиле потпретседателка на „Меѓународниот сојуз“, Јасна Мандиќ и Христина Блажевска, асистентка на Јовановски. Увидот е со цел осомничените да се подготват за давање исказ во Обвинтелството во текот на наредната недела.
„Лажно прикажувајќи дека ќе обезбеди државно неизградено земјиште за изградба на центар за возрасни лица и мобилен сервис, а потоа и субвенционирање од страна на државата, тој од оштетените преку авторска агенција успеал да добие парични средства од 719.905 евра од едното правно лице и 233.821 евра од другото. Останатите осомничени лица со умисла му помагале на првоосомничениот во извршувањето на кривичните дела изготвувајќи договори, подигнувајќи ги уплатените средства и уплаќајќи средства на други правни лица по основ на позајмица или донација“, информираа од Обвинителството.
Ременски во октомври по давањето исказ пред судија на претходна постапка кажа дека не чувствува никаква вина. Додека докажува невиност во случајот, таа е суспендирана од функциите во Централниот и од Извршниот одбор на СДСМ за, како што рече премиерот Заев, да не влијае на политиката.