Шкендија и Пелистер ќе играат во финалето на фудбалскиот Куп на Македонија. Предноста (3:1) што тетовци ја понесоа од „Телеком арена“ по првиот дуел со скопските „црвено-црни“ се покажа како доволна во реваншот. Вардарци попладнево возвратија со 1:0 што, сепак, беше недоволно за меч за титула. Дарко Велковски го реши победникот под Шара во 61 минута.
Играч на натпреварот беше голманот на Шкендија, Марко Јовановски кој со своите интервенции не дозволи втора радост за лидерот на првенствената табела. А, ги имаше неколку преку Боарето, Блажевски, Барсегјан и Којашевиќ, но втор гол изостана. Двата тима цел час играа со 10 фудбалери по исклучувањата на капитените Ферхан Хасани и Бобан Грнчаров во 32 минута.
Пелистер, пак, во реваншот ја совлада Брегалница со 1:0. Стрелец на единствениот гол беше Бразилецот Лукас Фереира Кардозо во 80 минута. Првиот дуел во Штип заврши без победник 2:2.
Финалето во Купот на Македонија е закажано на 17 мај. За Шкендија ќе биде четврто по двата пораза (2006 година и во 2013 година) и ланската победа над Работнички со 2:0. И пелистерци трипати досега играа за пехарот и го освоија еднаш во 2001 против Слога Југомагнат со 2:1. Во 1993 година загубија од Вардар со 1:0, во 1994 година од Силекс на пенали со 4:2.