Барселона, Борусија Дортмунд, ПСЖ и Арсенал со утешни трофеи на крај на сезоната. По неуспешните мисии за шампионски титули во Примера, во Бундеслигата, во Лига 1 и во Премиерлигата, четирите клуба се победници во националните купови на Шпанија, на Германија, на Франција и на Англија.
Луис Енрике заминува од „Камп Ноу“ со пехар во „Копа Дел Реј“ по триумфот на Барселона против Алавес со 3:1. Сите четири гола на „Висенте Калдерон“ во Мадрид беа постигнати во последните третина од првото полувреме. Серијата во финалето ја отвори Лионел Меси по пола час игра, а три минути по него израмни Ернандез. Фаворизираните Каталонци погодија уште двапати до паузата преку Нејмар во 45 минута и Пако во третата од судиското надополнување за печат на 29. трофеј во натпреварувањето.
Борусија Д. се радуваше на Олимпискиот стадион во Берлин по победата во финалето на германскиот Куп против Ајнтрахт со 2:1. Дембеле во осмата минута и Обамејанг во 67. од пенал реализира за „милионерите“, Ребиќ во 29 минута го потпиша единствениот за тимот од Франкфурт. За „жолто-црните“ од Дортмунд ова е четврта титула во натпреварувањето, прва воопшто по 2012 година во која ја освоија двојната круна.
ПСЖ, пак, по 11 пат во клупската историја го понесе трофејот во Купот на Франција. „Светците“ во големото финале на „Стад де Франс“ го поразија Анжер со 1:0 со автогол на Сенегалецот Иса Сисоко во првата минута од екстра времето во натпреварот.
И, конечно, Арсенал спречи двојна круна за Челзи во англискиот фудбал во оваа сезона. „Топчиите“ на „Вембли“ го поразија Челзи со 2:1 и по рекорден 13 пат го освоија ФА купот. Алексис Санчез во четвртата минута и Арон Рамси во 79. „стрелаа“ за составот на Арсен Венгер, Диего Коста го постигна единствениот за лондонските „сини“ на Антонио Конте кои од 68. играа со играч помалку по исклучувањето на Мозес.
Финале, Куп на Шпанија: Барселона – Алавес 3:1
Финале, Куп на Германија: Борусија Д. – Ајнтрахт Ф. 2:1
Финале, Куп на Франција: ПСЖ – Анжер 1:0
Финале, ФА Куп: Арсенал – Челзи 2:1