Седум гола на Германија, три хет-трика и „битка за Британија“ без победник ги одбележаа деветте саботни дуели во квалификациите за Светското фудбалско првенство во Русија. „Панцирите“ во Нирнберг ја наполнија мрежата на Сан Марино (7:0) во натпревар во кој селекторот Јоаким Лев изведе почетен состав со играчи од 11 различни клуба. Сандро Вагнер од Хофенхајм трипати ја тресеше противничката мрежа (16′, 29′, 85′), по корнери погодуваа и Јунес (38′) и Мустафи (47′), меѓу стрелците се додадоа и Дракслер (11′) и Бранд (72′).
Вториот хет-трик беше дело на Роберт Левандовски во триумфот на Полска над Романија со 3:1. Напаѓачот на минхенски Баерн беше двапати сигурен од белата точка (29′, 62′) и еднаш од игра (57′) по корнерот на Зиелински за, негови, вкупно 11 гола во циклусот колку што има и Кристијано Роналдо. Поразот на Романците го ублажи Богдан Станку во 77 минута.
Третиот троен стрелец го поздрави публиката во Подгорица каде Црна Гора ја совалда Ерменија со 4:1. Серијата голови на домашната селекција ја отвори Фатон Беќирај во втората минута по што продолжението мина во знакот на Стеван Јоветиќ. Фудбалерот на Севилја се надоврза во листата на стрелци во 28 минута, во 54. и во 82. за одржување чекор со Данска за второто место во групата Е. Двете селекции имаат по десет бода од шест меча, шест помалку од Полјаците на чело на табелата.
Шкотска и Англија одиграа 2:2 во островската пресметка во групата Ф. Сите четири погодоци беа постигнати во завршните 20 минути. Чембрлен обезбеди предност за „Гордиот албион“ во 70 минута, а Грифитс во 87 минута и во 90. направи пресврт и ги поведе Шкотланѓаните во судиското екстра време со гол повеќе од ривалот. Нивната прослава, сепак, ја расипа Хари Кејн кој во третата минута од продолжението погоди за спас на Англичаните од пораз на „Хемпден парк“ во Глазгов.
Квалификации за СП 2018 – зона УЕФА
Група Ц, 6 коло
Германија – Сан Марино 7:0
Норвешка – Чешка 1:1
Азербејџан – Северна Ирска 0:1
Табела: Германија 18, Северна Ирска 13, Чешка 9, Азербејџан 7, Норвешка 4, Сан Марино 0.
Идно коло (1 септември): Чешка – Германија, Сан Марино – Северна Ирска, Норвешка – Азербејџан.
Група Е, 6 коло
Црна Гора – Ерменија 4:1
Полска – Романија 3:1
Казахстан – Данска 1:3
Табела: Полска 16, Црна Гора 10, Данска 10, Романија 6, Ерменија 6, Казахстан 2.
Идно коло (1 септември): Данска – Полска, Казахстан – Црна Гора, Романија – Ерменија.
Група Ф, 6 коло
Литванија – Словачка 1:2
Шкотска – Англија 2:2
Словенија – Малта 2:0
Табела: Англија 14, Словачка 12, Словенија 11, Шкотска 8, Литванија 5, Малта 0.
Идно коло (1 септември): Малта – Англија, Словачка – Словенија, Литванија – Шкотска.