Баерн Минхен и Реал Мадрид се први четвртфиналисти во фудбалската Лига на шампиони. Германскиот и шпанскиот гигант се погрижија за резултатско пресликување на првите средби и во реваншите против Арсенал, односно, Наполи. Баварците, и во Лондон, ги декласираа „топчиите“ со 5:1, „кралевите“, пак, беа подобри од калчолигашот и на „Сан Паоло“ со 3:1.
Неизвесност на југот на Италија имаше едно полувреме. Наполитанците успеаја до гол во 24 минута преку Мертенс по асистенција на Хамшик, но пат до мрежата на Кејлор Навас по вторпат не најдоа. Наместо тие, погодија гостите од Мадрид за ставање крај на секакви дилеми, ако воопшто и постоеја, околу победникот во двомечот. И тоа не еднаш туку двапати за кус временски период.
Инспиратор за пресврт на тимот на Зидан беше Серхио Рамос. Капитенот искористи два прекина во противничкиот казнен простор, во 52 минута и во 57 минута, и двапати го матира Пепе Реина. Печат на триумфот стави Алваро Мората во судиското продолжение на средбата.
„Петарда“ на Баварците и во Лондон
Сличен тек имаше натпреварт и во Лондон меѓу Арсенал и Баерн Минхен. „Топчиите“ поведоа во 20 минута со прекрасниот гол на Тео Волкот и со предност од 1:0 заминаа на полувреме. Но, второто беше крајно неповолно за домашната екипа. Кошчелни во 53 минута доби црвен картон по што бродот на Арсен Венгер почна да тоне.
Роберт Левандовски реализира пенал во 55 минута за израмување на 1:1, Роберт погоди во 68 минута за пресврт и водство на Баварците со 2:1. Десет минути по Холанѓанецот во листата на стрелци се додаде Даглас Коста за 3:1 за Артуро Видал во 80 минута и во 85 минута ги постави конечните 5:1 во Лондон.
Лига на шампиони
Осминафинале, реванши
Арсенал – Баерн Минхен 1:5 ( прв меч 1:5)
Наполи – Реал Мадрид 1:3 (1:3)