Два незаборавни меча донесе третата осминафинална вечер во фудбалската Лига на шампиони. Фудбалските претстави на „Етихад“ и на „Бај Арена“ понудија мноштво моменти за незаборав, возбудувања, резултатски пресврт и неколку ефектни реализации од вкупно 14. Манчестер сити го совлада Монако со 5:3, а Атлетико Мадрид беше подобар од Баер во Леверкузен со 4:2.
Неверојатен натпревар одиграа англискиот и францускиот тим на Островот во кој централна фигура беше Серхио Агуеро. Аргентинецот беше двоен стрелец (58′ и 71′) за екипата на Гвардиола и асистира до Сане во 82 минута за мирен реванш на „Луј Втори“. Останатите два за „граѓаните“ ги потпишаа Стерлинг во 26 минута и Стоунс во 77 минута.
Радамел Фалкао потврди дека се наоѓа во одлична форма. Колумбиецот двапати ја тресеше мрежата на Кабалеро (32′ и 61′), а можеше и до хет-трик доколку успееше да реализира од белата точка во 51 минута. Мбапе во 40 минута погоди за 1:2 за гостите на полувреме. Вечерашниот дуел е одлична најава за интересни, втори, 90 минути и во Монте Карло како и за резултатската отвореност на двомечот.
Атлетико Мадрид ги реши осминафиналните дилеми против Баер уште во Леверкузен. Шпанскиот состав го разби бундеслигашот со 4:2 правејќи ја формална возвратната средба на „Висенте Калдерон“. Нигез во 17 минута, Гризман во 25 минута, Гамеиро во 59 минута и Торес во 86 минута се погрижија за четврт-финалето да биде невозможна мисија за „фармацевтите“. Белараби во 48 минута и Савиќ со автогол во 68 минута ги постигнаа двата за германскиот претставник.
Лига на шампиони
Осминафинале
Манчестер сити – Монао 5:3
Баер Леверкузен – Атлетико Мадрид 2:4