Австралија е 31. земја што обезбеди пласман на Светското првенство во Русија во 2018 година. По ремито без голови во Тегусигалпе, „кенгурите“ во реваншот го совладаа Хондурас со 3:1 и по четврти пат во низа ќе играат на мундијалите.
Централна фигура на стадионот „АНЗ“ во Сиднеј претпладнево беше 33 годишниот капитен на домашната селекција, Миле Јединак кој постигна хет-трик во второто полувреме. Фудбалерот на Астон Вила најпрво погоди во 53 минута за израмнување за вечерта за паметење да ја комплетира со два прецизни удара од белата точка во продолжение на средбата. Во 72 минута го реализира првиот пенал, во 85. и вториот за отстранување на сите дилеми околу победникот во бараж двомечот.
Единствениот гол за претставникот на КОНКАКАФ зоната (фудбалска конфедерација на Северна и Средна Америка и Карибите) беше Алберто Елис во четвртата минута од судиското надополнување.
Последниот патник на СП 2018 ќе биде познат по одигрување на реваншот меѓу Перу и Нов Зеланд што се игра ноќеска во 03,15 часот по средноевропско време.