За попладнево е закажано „дерби дела мадонина“ како што популарно ги нарекуваат пресметките меѓу градските ривали Милан и Интер, вечерва, пак, Рома ѝ гостува на Барселона во првиот четвртфинален дуел во Лигата на шампиони (ЛШ), но италијанската и светската јавност се преокупирани со ремек делото на Кристијано Роналдо во фуриозната вечер на Реал против Јувентус во Торино. Португалецот ја пресече „старата дама“ со „ножички“ во 64. минута, момент за кој беше награден со аплауз од трибините на „Јуве арена“, патем го постигна и првиот гол и асистира за третиот во блескавата партија на „кралевите“ кои славеа со 3:0 и уште од сега може да се прогласат за полуфиналисти во натпреварувањето.
https://www.youtube.com/watch?v=CqGPOhMTsNM
Го призна тоа и Масимилијано Алегри кој пред мечот најави дека ќе стане од клупата на „бјанконерите“ по завршување на сезоната, а по дебаклот од мадриѓани истакна дека се насочува на италијанското првенство и куп.
Кристијано Роналдо, пак, истакна дека не очекувал аплауз од навивачите на Јувентус по реализацијата што сигурно ќе влезе во конкуренција за наградата „Ференц Пушкаш“ за најдобрата во една календарска година.
„Моментот беше неверојатен. Единствено што можам е да упатам благодарност во фановите на Јувентус. Нивната реакција беше навистина пријатна. Такво нешто никогаш не сум доживеал во кариерата што ме прави уште посреќен“, истакна Роналдо за официјалната интернет страница на Европската фудбалска асоцијација (УЕФА).
Покрај најубавиот гол во историјата на ЛШ, Португалецот собори и рекорд во елитното натпреварување на УЕФА. Стана првиот фудбалер кој успеа да постигне барем по еден погодок во десет меча во низа со што го надмина Холанѓанецот Руд ван Нистелрој.
„Каков гол дадов? – Што да кажам? – Фантастичен. Не очекував дека ќе постигнам таков погодок, но она што, сепак, е најважно е дека победивме. Трипати ја тресевме мрежата на Јувентус, кој без оглед на резултатот е голем клуб, игравме одлично и задоволни сме“, додаде „седумката“ на „кралскиот клуб“.
Роналдо воедно е најдобар стрелец во Европа за оваа сезона со досегашните 39 гола.
Лига на шампиони
Четврт-финале, први мечеви
Јувентус – Реал Мадрид 0:3
Севилја – Баерн Минхен 1:2
Вечерва играат
Барселона – Рома (20,45 ч.)
Ливерпул – Манчестер сити (20,45 ч.)