Фудбалските претставници од просторите на поранешна Југославија како ретко кое лето досега, во така голем број, се наоѓаат на праг на плеј-оф во Лигата на шампиони (ЛШ) и, особено, во Лига Европа (ЛЕ). Исклучок се екипите од Црна Гора, БиХ и Косово кои завршија во меѓународните авантури за ова лето, па повеќе среќа и подобра ждрепка ќе очекуваат во наредното.
Останаа десет на број од кои шест во ЛЕ и четири во ЛШ. Во најнезавидна ситуација е српскиот првак Партизан кој ќе патува на реванш против Олимпијакос со 1:3 од Белград. Но, олеснителна околност за „црно-белите“ е што и при елиминација во Пиреја, како многу веројатна опција, ќе останат на меѓународната сцена и ќе продолжат во плеј-офот за второто по ранг натпреварување на УЕФА.
Истото ова важи и за Вардар во случај оние 1:0 од „Телеком арена“ во Скопје против Копенхаген да не бидат доволни на реваншот во Данска.
Риека има одлични 1:1 од гостувањето во Австрија кај Салцбург, а Марибор ќе „летне“ на Исланд на мегдан со Хафнарфјордур со предност од 1:0 по воведните 90 минути на стадионот „Људски врт“.
Слична е ситуацијата со екс-ју екипите и во квалификациите за Лига Европа. Црвена звезда и Динамо Загреб ја искористија предноста на домашниот терен и со победи ќе одбројуваат до гостувањата во Чешка, односно, Норвешка.
„Црвено-белите“, на стадионот „Рајко Митиќ“, ја поразија Спарта со 2:0 што треба да бидат доволни во реваншот во Прага за прогрес во натпреварувањето. „Модрите“, пак, неочекувано тесно (2:1) триумфираа над Одд Гренланд на „Максимир“ меѓутоа и таквиот исход би требало да биде доволен за премостување на норвешкиот ривал во возвратниот дуел во Скјен.
Голем триумф на гости што одекна како сензација во фудбалска Европа забележа Осиек. Тимот на Музафер Ејупи и Милован Петровиќ славеше на гостувањето кај ПСВ Ајндховен со 1:0 што му дава за право да полага голема надеж за конечна победа во двомечот со гигантот од Холандија.
Хајдук успеа остане непоразен (0:0) на теренот на Брондби, па „билите“ во реваншот на „Пољуд“ ќе атакуваат на било каква победа за елиминација на данскиот ривал.
Шкендија има одличен пораз по гостувањето во Литванија ако воопшто и може да се опише пораз како одличен резултат во спортот. Но, во случајот со тетовци е со оглед дека останаа со двајца фудбалери помалку во последните 30. минути во Вилнус и успеаја да се останат на двата примени гола до исклучувањата на Жуниор (57 минута) и Цуцули (62 минута). Погодокот што го постигна Бразилецот, по одлична асистенција од Хасани, може да биде и решавачки за севкупниот победник во 180. минути од македонско-литванската пресметка.
Со најтешка задача за реваншот е тимот на Домжале кој ќе мора да брка триумф со два гола разлика и тоа против секогаш упорни Германци. Фрајбург се радуваше со 1:0 по 90. минути на својот „Шварцвалд“ стадион задавајќи му комплицирана домашна задача на словенечкиот состав.
Лига Европа/квалификации/3 коло/први мечеви
Тракаи (Литванија) – Шкендија (Македонија) 2:1
ПСВ Ајндховен (Холандија) – Осиек (Хрватска) 0:1
Брондби (Данска) – Хајдук (Хрватска) 0:0
Црвена звезда (Србија) – Спарта Прага (Чешка) 2:0
Динамо Загреб (Хрватска) – Одд Гренланд (Норвешка) 2:1
Фрајбург (Германија) – Домжале (Словенија) 1:0
Лига на шампиони/квалификации/3 коло/први мечеви
Салцбург (Австрија) – Риека (Хрватска) 1:1
Марибор (Словенија) – Хафнарфјордур (Исланд) 1:0
Вардар (Македонија) – Копенхаген (Данска) 1:0
Партизан (Србија) – Олимпијакос (Грција) 1:3