Ивица Олиќ објави крај на фудбалската кариера. Хрватот лани се повлече на репрезентативен план, а сега и на клупски, но најави дека ќе остане дел од најважната споредна работа на светот како тренер.
„Подготвен сум да ги закажам копачките на ѕид. Заминувам со чиста совест. Среќен сум, се забавував, доживеав многу успеси и можам да кажам дека давав максимум од себе и на тренинзите и на натпреварите. За мене беше сон да играм на високо ниво толку долг период“, најави поранешниот хрватски репрезентативец во разговор за „Билд“.
Последната сезона ја одигра во дресот на Минхен 1860, клуб кој го загуби статусот и во популарната „Цвајте“ и се пресели во третата германска лига.
„Жалам што заминувам, а клубот испадна во трета лига. Го сакам овој клуб, традиционален е, но има доста проблеми во него веќе подолго време“, додаде хрватскиот напаѓач.
Кариерата ја започна во Марсонија во 1996 година. Настапуваше и за Динамо Згреб, за московска ЦСКА со која трипати беше првак на Русија, а во 2005 година го освои и Купот на УЕФА. Во Германија смени пет средини – од Херта, преку Хамбург, Баерн, Волфсбург и Минхен 1860. Но, неговата одлука за крај на активното играње не значи и целосно излегување од фудбалот.
„За нов почеток планирам да отпочнам процес за добивање на тренерска лиценца“, истакна Олиќ.
За репрезентацијата на Хрватска дебитира во 2002 година, а се повлече во март во 2016 година. За тоа време одигра 104 средби и постигна 20 гола.