Лидерот на табелата и бранител на титулата ремизира со Шкупи на Чаир (0:0), вицешампионот го совлада Силекс во Кратово со 3:1. Вардар сега има два бода повеќе од Шкендија пред меѓусебниот дуел во недела во Тетово
Предноста од четири бода што Вардар ја имаше во однос на Шкендија пред мечевите од 10 коло во фудбалскиот шампионат на Македонија се преполови по нивното одигрување. Лидерот на табелата ремизира со Шкупи на Чаир (0:0), а тетовскиот клуб го совлада Силекс во Кратово со 3:1, па „црвено-црните“ од Скопје и тренерот Седлоски западнаа во незгодна ситуација.
Велиме незгодна затоа што наредниот викенд Вардар го чека дуел со Шкендија и тоа во Тетово, а составот на Бруно Акраповиќ допрва треба да одигра и натпревар со Шкупи што беше поместен поради настапите во квалификациите за Лигата на Европа во летнниот период.
Ако на Чаир, попладнево, немаше голови, гледачи во Кратово видоа дури четири од кои три во мрежата на домашниот тим. Бесарт Ибраими беше двоен стрелец за Шкендија (49 и 65 минута), третиот за тетовци, прв на средбата, го постигна Жуниор по само 120 секунди игра. Единствениот за Силекс беше дело на Недељковиќ во 75 минута.
Пелистер со 2:0 ја совлада Победа. Бујчевски во 62 минута и Фереира Кардосо во продолжение на мечот беа стрелци за битолчани. Исклучен кај гостите беше Колевски во првото полувреме.
Ренова во Тетово ја совлада Брегалница со 1:0. Одлучувачкиот момент се случи во 75 минута во која погоди Нухи. Десет минути по примениот гол, штипјани останаа со 10 играчи на теренот. Црвен карто доби Ѓорески.
Вчера Работнички со пресврт во второто полувреме и еврогол на Најденов славеше победа над Македонија Ѓорче Петров со 2:1.
Фудбал, Прва лига
10. коло, резултати: Шкупи – Вардар 0:0, Силекс – Шкендија 1:3, Ренова – Брегалница 1:0, Пелистер – Победа 2:0, Работнички – Македонија Ѓорче Петров 2:1.
Табела: Вардар 22, Шкендија 20 (-1 меч), Работнички 16, Пелистер 15, Ренова 15, Шкупи 10 (-1), Силекс 10, Победа 9, Брегалница 7, Македонија Ѓорче Петров 6.
Наредно коло: Шкендија – Вардар, Работнички – Шкупи, Победа – Силекс, Брегалница – Пелистер, Македонија Ѓорче Петров – Ренова. Мечевите се играат на 23 октомври со почеток во 14.30 часот.