Шкупи дополнително ги обремени амбициите на Вардар за одбрана на шампионската титула во домашното фудбалско првенство. Чаирчани славеа над скопските „црвено-црни“ со 2:0 во меч од 18 коло во сезоната, резултат што беше дочекан со аплауз на „Еколог арена“ во Тетово додека Шкендија ги обезбедуваше трите бода во дуелот со Пелистер. Нокаутот на вардарци на Чаир, нивни четврти во сезоната, го продуцираа Ален Јашаровски во 62 минута и Кристијан Стојкоски во 86 минута.
Вицешампионот, пак, не препушти ништо на случајот против битолчани под Шара. Тетовци на крајот триумфираа со 3:0 со погодоците на Бесарт Исмаили во 49 минута, на Ферхан Хасани во 68 минута од белата точка и на 18 годишниот Арбин Зејнулаи во 90 минута. Шкендија е лидер на првенствената табела со 46 бода, 14 повеќе од Вардар кој има и два меча помалку – одложените со Работнички и со Академија Пандев поради настапите во групната фаза во Лига Европа.
Работнички ја оправда улогата на фаворит во мечот со Скопје на „Телеком арена“. „Црвените“ од Градски парк без проблеми излегоа на крај со фенерџијата (3:0) и повторно ја истакнаа својата кандидатура за излез на меѓународната сцена во летниот период во 2018 година. Двоен стрелец за домашните беше Сержињо (83′ и 90′), откако водство за четирикратниот македонски првак осигура Душко Трајчевски во 49 минута.
Силекс со погодокот на Милош Ѓорѓевиќ во 15 минута славеше над Академија Пандев во Струмица со 1:0, а Победа и Ренова го одиграа единствениот натпревар без победник во 18. рунда. Филип Најдовски реализира за прилепчани во 73 минута, негативата на тетовци ја поништи Валмир Нафиу од пенал во 80 минута.
Фудбал – Прва лига, 18 коло
Шкендија – Пелистер 3:0
Шкупи – Вардар 2:0
Академија Пандев – Силекс 0:1
Работнички – Скопје 3:0
Победа – Ренова 1:1
Табела: Шкендија 46 бода, Вардар 32 (-2), Силекс 31, Академија Пандев 25 (-1), Работнички 23 (-1), Шкупи 23, Победа 19, Ренова 18, Пелистер 16, Скопје 10.