Заврши 25. фудбалска сезона во самостојна Македонија. Дилемите за титулата, за местата што водат во Европа, за тоа која екипа ќе игра бараж, а кои ќе загубат прволигашки статус беа познати неколку недели пред крајот. Па, во отсуство на секаква неизвесност, во фокусот се најде стадионот во Ѓорче Петров со неколку моменти за одбележување.
Вардар го подигна 11 шампионски трофеј, поранешниот македонски репрезентативец Влатко Гроздановски ја заврши кариерата, а Благоја Љамчевски се раздели со скопските „црвено-црни“. Претседателот Мирко Спасески, во име на клубот, му врачи благодарница на долгодишниот спортски новинар и коментатор во Македонската телевизија, Златко Калински, кој по 42 години работен стаж заминува во пензија.
Сега и за резултатскиот финиш на првенството. Најтрофејниот фудбалски колектив во Македонија одигра 0:0 против Силекс во последното коло, а победник немаше ниту на Чаир во средбата меѓу Шкупи и Македонија Ѓ.П. Шкендија со пресврт во второто полувреме го совлада Пелистер со 3:1, Брегалница во меч без никакво значење го порази Работнички со 6:2. Единствената гостинска победа ја запиша Ренова против Победа со 3:0.
Вардар ќе игра во квалификациите за Лигата на шампиони, Шкендија, Работнички и Пелистер, како победник во Купот на Македонија, во квалификациите за Лига Европа. Во понизок ранг се селат Македонија Ѓорче Петров и Брегалница, а нови прволигаши се Академија Пандев и Скопје. Шкупи како осмопласиран во Прва лига и Новаци како третопласиран во Втора лига ќе играат бараж за пополнување на елитната конкуренција за наредната сезона.
Прва лига, 36 коло
Резултати
Вардар – Силекс 0:0
Шкендија – Пелистер 3:1
Шкупи – Македонија Ѓ.П. 1:1
Победа – Ренова 0:3
Брегалница – Работнички 6:2
Табела: Вардар 83, Шкендија 70, Работнички 54, Пелистер 52, Ренова 52, Силекс 47, Победа 41, Шкупи 37, Брегалница 24, Македонија Ѓ.П. 23.