Стефан Спировски го доби признанието за најдобар во домашото првенство, а Енис Барди за најдобар во странство на традиционалната свеченост „Фудбалер на годината“ во организацијата на Фудбалската федерација на Македонија (ФФМ).
Спировски беше спречен да присуствува на настанот што вечерва се одржа во Македонскиот народен театар (МНТ). Причина се клупските обврски кон унгарски Ференцварош на кој му пристапи во летниот преоден рок од екипата на Вардар.
Барди, пак, немаше обврски кон Леванте во деновите од викендот (одигра цел меч во петокот против Малага) и беше дел од изборот во МНТ. Статуетката за ја доби од Раул Гонзалез, тренер на европскиот ракометен првак Вардар и воедно селектор на Македонија.
За најдобар млад играч е прогласен Елиф Елмас од Фенербахче кој во 2017 година настапи со националниот тим (У21) на ЕП во Полска. Признанието за тренер на годината заврши кај Гоце Седлоски, а за најдобар стрелец кај напаѓачот на Шкендија, Бесарт Ибраими.
Горан Станковски ја прими наградата за најдобар тренер во младински категории, а Работнички, покрај него, може да се пофали дека ја поседува и најдобрата екипа во младински фудбал, но дека ја има и фер-плеј екипата за 2017 година. Александар Мишов од Академија Пандев е прогласен за најдобар стрелец во младинска категорија.
Судија на година е интернационалецот Александар Ставрев, најдобар фудбалски работник е Илија Матеничаров од Академија Пандев. Зоран Лекиќ од КФМ Шкупи е прогласен за најдобар тренер во футсал, категорија во која наградата за најдобар играч ја однесе Александар Глигоров од КФМ Велес.
Најдобар тренер во женски фудбал за 2017 година е Кирил Изов од ЖФК Истатов, најдобра фудбалерка е Илза Максути од ЖФК Ас јунајтед), а признанието за најдобар стрелец кај дамите заврши во рацете на Ленче Андреевска од ЖФК Драгон.
Специјални признанија им беа доделени на Вујадин Станојковиќ, кормилар на репрезентацијата на фудбалери до 19 години како и на Горан Станиќ, селектор на националниот тим У17.