Германија и Турција се единствени кандидати за домаќини на Европското фудбалско првенство во 2024 година, соопшти УЕФА.
„Примивме само две целосни апликации, но, сеедно, Извршниот одбор ќе има тешка задача при носење на конечната одлука во септември во 2018 година“, изјави Теодор Теодоридис, генерален секретар на европската Куќа на фудбалот.
Интерес за организација на турнирот по седум години имаше и на север на континентот. Заедничка кандидатура подготвуваа Данска, Шведска, Норвешка и Финска, кои на крајот на февруари, сепак, се откажаа од намерата.
Европското првенство во 2024 година ќе се одржи на девет или десет стадиони од кои два мора да бидат со поголем капацитет од 50.000 гледачи, еден и со над 60.000 седишта додека ниту еден град не може да биде домаќин со капацитет под 30.000 места.
Турција никогаш не била домаќин на ЕП што не е случај со Германија која го организира континенталниот турнир во 1988 година и планетарниот во 2006 година.
Последното ЕП се одржа во Франција. Наредното, пак, во 2020 година ќе биде во 13 европски градови со полуфинални пресметки и финале на „Вембли“.