Шефовите на држави и влади на групата Г-20 би можеле остро да ја осудат Русија за нејзиниот напад врз Украина. Изгледа дека Г-20 ќе стави до знаење дека оваа војна не е прифатлива, вели германскиот канцелар Олаф Шолц.
Во предлогот на завршната изјава, која ја објави Ројтерс, се предлага остра критика:
„Мнозинството членови најостро ја осудија војната во Украина и истакнаа дека таа предизвика огромно човечко страдање и ги влоши постојните слаби точки на светската економија“, се вели во текстот, кој би требало да биде прифатен утре на состанокот на претседателите на државите и владите на 20-те најразвиени индустриски земји.
Дводневната конференција под претседателство на Индонезија, која се одржува на индонезискиот остров Бали, остана во сенка на руската агресија врз Украина која започна на 24 февруари годинава.
Германскиот канцелар Олаф Шолц уште пред самитот изјави дека за војната мора да се разговара на состанокот на групата Г-20. Тој досега учествуваше во две рунди разговори и извести дека постојано се разговарало за руската војна во Украина.
„Изгледа дека групата Г-20 ќе стави до знаење дека оваа војна не е прифатлива. Покрај тоа, Г-20 има намера да испрати јасна порака дека употребата на нуклеарно оружје не доаѓа предвид. Се чини дека има консензус за тоа“, рече Шолц и додаде дека тоа е голем напредок, бидејќи на почетокот на руската војна во Украина тоа не можеше да се очекува.
На средбата учествуваат и американскиот претседател Џозеф Бајден и кинескиот претседател Си Ѓинпинг, кои претходно се сретнаа одделно и разговараа три часа.
Рускиот претседател Путин не дојде. Тој го испрати својот министер за надворешни работи Сергеј Лавров. Лавров беше присутен и во салата кога преку видео врска се приклучи и украинскиот претседател Володимир Зеленски и побара прекин на војната.
Во предлогот на завршната изјава се посочува и дека огромното мнозинство членки на ОН веќе го осудија рускиот напад врз Украина. Покрај тоа, нацрт-завршната изјава повикува на „целосно и безусловно повлекување од украинска територија“. Американскиот претставник рече дека САД очекуваат Г-20 да ја осудат руската војна во Украина и нејзиното влијание врз светската економија.
Нацрт-завршната изјава укажува дека војната во Украина го ограничува економскиот раст во светот, ја поттикнува инфлацијата, ги нарушува синџирите на снабдување, ја зголемува несигурноста во снабдувањето со енергија и храна и ги зголемува ризиците за финансиската стабилност.