Ливерпул галопира кон шампионската титула во англиската Премиерлигата во која сè уште не знае за пораз во оваа сезона. За „црвените“ на Јирген Клоп повеќе нема непобедени ривали во конкуренцијата, откако попладнево на „Енфилд“ падна и Манчестер јунајтед со 2:0 во дербито на 23. коло.
https://www.youtube.com/watch?v=ryHPRzyfm5U
Вирџил ван Дајк во 15. минута и Мохамед Салах во третата од судиското екстра време беа творци на 21 триумф на Ливерпул кој досега собра 64 бода од можни 66, а допрва треба да го одигра и одложениот натпревар со Весте Хем. За тимот на Манчестер јунајтед, пак, ова беше седми пораз во тековниот шампионат по кој е петти на табелата со 34 бода.
Ливерпул заслужено се радуваше во дербито со големиот ривал од „Олд Трафорд“. Во водство дојде по само 15 минути игра, кога корнерот на Трент Александер Арнолд во гол го претвори Ван Дајк кој беше доминантен во дуелот со младиот, послаб и понизок Вилијамс.
Вториот гол го потпиша египетскиот репрезентативец, Салах по асистенција на Алисон. Успеа да ги издржи дуелите со противничките играчи и да погоди во голот под култниот Коп на „Енфилд“ за печат на нова радост на „црвените“.
Покрај двата признати гола, во меѓувреме, Ливерпул постигна уште два што оправдано беа поништени по консултација на главниот судија со ВАР собата. Првиот на Роберто Фирмињо не беше признат поради претходен прекршок над Давид де Хеа, а вториот на Џини Вајналдум поради офсајд.
Манчестер Ј., па, во првиот дел упати само еден удар кон Алисон. Непрецизен во 40. минута беше Ентони Марсијал, кој се закани и во второто полувреме заедно со Фред, но мрежата на бразилскиот голман остана мирна.
Премиерлига, 23 коло
Ливерпул – Манчестер јунајтед 2:0
Барнли – Лестер 2:1
Њукасл – Челзи 1:0
Вест Хем – Евертон 1:1
Саутемптон – Вулверхемптон 2:3
Норич – Борнмут 1:0
Манчестер сити – Кристал Палас 2:2
Брајтон – Астон Вила 1:1
Арсенал – Шефилд јунајтед 1:1
Вотфорд – Тотенхем 0:0
Табела: Ливерпул 64 (-1), Манчестер сити 48, Лестер 45, челзи 39, Манчестер јунајтед 34, Вулверхемптон 34, Шефилд јунајтед 33, Тотенхем 31, Кристал Палас 30, Арсенал 29, Евертон 29, Њукасл 29, Саутемптон 28, Барнли 27, Брајтон 25, Вест Хем 23 (-1), Вотфорд 23, Астон Вила 22, Борнмут 20, Норич 17.