Управата на Манчестер јунајтед го отвора сефот за летниот преоден рок на задоволство на Жозе Мурињо. Ако Португалецот лани потроши 150 милиони евра на засилувања, оваа година ќе биде почастен со дополнителни 50 и за шопинг за наредната натпреварувачка сезона ќе располага со вкупно 200 милиони евра.
Менаџерот на Манчестер Ј. веќе ја има скроено листата со трансферни цели, но и со оние на кои нема да смета во иднина. Намера на „специјалниот“ е да направи „ѓаволски“ добар тим што ќе биде конкурентен на градскиот ривал Сити за титулата во Премиерлигата. За таа цел, според заменик директорот Ед Вудфорд, челниците на Јунајтед ќе покажат финансиска великодушност и ќе одобрат средства за принови од кои се очекува да ја зголемат моќта на гигантот од „Олд Трафорд“.
Британски „Сан“ ги објави и пиковите на кои ќе се фокусира Мурињо по завршување на сезоната. Меѓу желбите на Португалецот, според медиумот, се Жоржињо од Наполи, Алекс Сандро од Јувентус, Ектор Белерин од Арсенал и Тоби Алдервилд од Тотенхем. На излезна врата, пак, се Дели Блинд, Матео Дармијан, Маркус Рохо, Крис Смолинг и Фил Џонс.
Манчестер јунајтед моменто е втор на табелата во Премиерлигата со 68 бода, дури 16 помалку од лидерот Манчестер сити, и на „Олд Трафорд“ се свесни дека борбата за титулата е завршена работа. „Црвените ѓаволи“ се соочија со елиминација и во Лигата на шампиони по осминафиналниот двомеч со Севилја, па единствена шанса за трофеј гледаат во ФА купот, натпреварување во кое ќе играат против Тотенхем во полуфиналето.