Во Србија денеска повторно е на сила генерален штрајк, а на повикот на студентите и средношколците се одзваа бројни компании и државни институции. Освен што ги повикуваат луѓето да останат дома и да не купуваат намирници (или на друг начин да учествуваат во „економијата“), студентите и граѓаните најавија и најмалку два протестни марша.
Матурантите објавија план за протестна прошетка за денот на генералниот штрајк, наречена „Шетаме околу кругот на двајца“.
За 15 часот и 30 минути е планиран митинг кај Славија, по што во 16 часот ќе почнат со прошетка кон Министерството за образование, потоа кон Апелациониот суд и Владата, кон Палатата на правдата, по што во 17:25 часот ќе се вратат во Славија.
Од 17:30 до 17:45 ќе се одржи 15 минути молк, а потоа 15 минути врева. Во 18 часот ќе почнат говорите.
Во својот повик – упатен до „работниците на Србија“, велат дека оваа акција не е само протест.
„Тоа е повик да се обединат сите обесправени работници и граѓани кои се незадоволни од моменталната економско-социјална состојба во државата“, изјавија студентите.
Тие во своето соопштение пишуваат дека државата се фали со економски раст, но дека овој раст е постигнат со пот и труд на работничката класа, додека самите работници се обесправени и едвај можат да си обезбедат достоинствен живот за себе и за своите семејства. Додаваат дека работните места се добиваат преку политички врски, дека работниците се уценувани да извршуваат задачи надвор од нивните должности, а институциите кои треба да ги штитат правата остануваат неми набљудувачи.