Германија сигнализира промена на ветото за тенковите „Леопард“ за Украина. Германија нема да застане на патот доколку Полска сака да ги испрати своите тенкови „Леопард 2“ во Украина, рече германскиот министер за надворешни работи, сигнализирајќи можен пробив за Украина додека се обидува да ги зајакне своите сили пред очекуваната нова руска офанзива.
Единаесет месеци откако Русија го нападна нејзиниот јужен сосед, борбите се насочени во градот Бахмут на истокот на Украина, каде што руските платеници Вагнер и украинските сили се заглавени во битка.
Украинските власти со месеци ги повикуваат западните сојузници да им достават модерни тенкови „Леопард“ од германско производство, но Германија се воздржува да ги испрати или да им дозволи на другите земји од НАТО да го сторат тоа.
За време на состанокот на западните сојузници во воздухопловната база Рамштајн во Германија во петокот, не беше донесена одлука за снабдување со „Леопарди“, иако беа дадени ветувања за големи количини на друго оружје, вклучително и системи за противвоздушна одбрана и други модели на тенкови.
Тенковите „Леопард“, кои ги имаат низа земји на НАТО, но за чиј трансфер во Украина е потребно одобрение од Берлин, експертите за одбрана ги гледаат како најпогодни за Украина. Вакви тенкови се достапни во многу европски земји во голем број.
Социјалдемократската партија на канцеларот Олаф Шолц е традиционално скептична за воените вмешаности и претпазлива за ненадејните потези кои би можеле да предизвикаат Москва дополнително да ескалира.
Но, во очигледна промена во позицијата на Германија, министерката за надворешни работи Аналена Баербок рече дека нејзината влада нема да ја блокира Полска доколку таа ги испрати своите тенкови „Леопард 2“ без германско одобрение.
„Во моментов прашањето не е поставено, но ако нѐ прашаат, нема да застанеме на патот“, изјави таа за француската ТВ LCI, на прашањето за реакцијата на нејзината влада на таква полска одлука.
Забелешките на Баербок одат подалеку од коментарите на Шолц на самитот во Париз претходно во неделата дека сите одлуки за испорака на оружје ќе бидат донесени во координација со сојузниците, вклучително и Соединетите држави.
Украина вели дека оклопните борбени тенкови ќе им дадат на нејзините копнени трупи поголема мобилност и заштита пред новата руска офанзива што се очекува во наредните месеци.
Американските пратеници ја притиснаа својата влада во неделата да ги извезе главните борбени тенкови „М1 Абрамс“ во Украина, велејќи дека дури и испраќањето симболичен број ќе биде доволно за да ги поттикне европските сојузници да го сторат истото.
Велика Британија неодамна соопшти дека испорачува 14 тенкови „Челинџер 2“ на Украина. Нејзиниот министер за надворешни работи, Џејмс Клеверли, вчера рече дека сè уште сака меѓународен договор за обезбедување на Украина со тенковите од германско производство.
Францускиот претседател Емануел Макрон, пак, рече дека не ја исклучува можноста за испраќање тенкови „Леклер“ на Украина. Франција сепак има ограничен број од овие тенкови, околу 200, кои повеќе не ги произведува.
За споредба, има околу 2.000 тенкови „Леопард“ низ европските земји.
Минатата недела, портпаролот на Кремљ рече дека западните земји кои испорачуваат дополнителни тенкови на Украина нема да го сменат текот на конфликтот, туку ќе придонесат за проблемите на украинскиот народ.
Близок сојузник на рускиот претседател Путин се закани дека испораката на офанзивно оружје за Киев што ги загрозува териториите на Русија ќе доведе до глобална катастрофа и ќе ги направи неодржливи аргументите против употребата на оружје за масовно уништување.
извор: Еуроактив