Германската полиција истражува илјадници можни случаи на фалсификување на потврди за вакцинација против коронавирусот, јави агенцијата ДПА. Податоците од 16 германски покраини покажуваат дека полицијата отворила над 12.000 такви истраги.
Бројот на истраги е нагло зголемен во декември, откако властите објавија нови рестрикции со кои, воглавно, невакцинираните лица се исклучени од јавниот живот, пренесува „Бета“.
Лицата кои доставуваат или користат лажни потврди се соочуваат со тешки казни – од парични и условни затворски до губење на работното место.
Обвинителите отворија и истрага за убиство од небрежност, а осомничена е жена која користела лажна потврда за вакцинација за да може да продолжи да работи во дом за стари лица, иако живеела со членови на семејство кои биле заболени со ковид-19.
Наското се очекува да почне дебата во германскиот парламент за општа задолжителна вакцинација, иако официјални лица признаваат дека ќе минат месеци додека таква мерка стапи на сила.
Речиси 73 отсто од населението на Германија е целосно вакцинирано против коронавирусот, додека 48 отсто примиле засилувачка доза на вакцина, пренесува „Ал Џазира Балканс“.
Германија вчера пријави рекорден број на новозаболени со ковид-19. За 24 часа биле регистрирани 112.323 нови инфекции и 239 смртни случаи како последица на заразата со ковид-19.