Германската канцеларка го осуди денес на “најсилен можен начин” обидот за воен удар во Турција и побара почитување на правната држава, но во своето обраќање не го спомена претседателот Ердоган ни со еден збор.

“Во име на целата германска влада го осудувам на најсилен можен начин обидот да се урне со насилство избраната турска влада”, рече таа. И додаде дека “третманот на одговорните за овие трагични настани од минатата ноќ мора да ја почитува правната држава”.

Во нејзината изјава таа не стави на знаење во ниту еден миг дека остварила контакт со него. Што е јасен сигнал дека Меркел се дистанцира од турскиот автократ. Нејзината осуда е направена во име на демократијата а не како поддршка на Ердоган.

Истовремено 2.745 судии во Турција беа сменети од нивните функции преку високиот совет за судии и обвинители, јави про-владината агенција Анадолу. Пет члена на овој совет исто така беа сменети.

Во текот на неуспешниот воен удар загинаа 161 лице и 1.440 се ранети. Помеѓу нив има и цивили и оние што и биле лојални на власта, изјави турскиот премиер. Интерим шефот на армијата утринава изјави дека 104 бунтовници биле убиени.

Премиерот рече дека 2.839 војници се уапсени во текот на ударот кој е, според него, “дамка” врз “турската демократија”.

“Овие кукавици ќе ја добијат казната што ја заслужуваат”, изјави тој.

Турција побара екстрадиција на осуммина пучисти кои со хеликоптер стасале на северот на Грција во Александропули.

Ситуацијата во Турција не е сосема нормализирана. Францускиот конзулат ги повика француските граѓани и денес да не излегуваат од дома бидејќи вечерва се очекуваат толпи на народ на улиците. Откако Ердоган го повика населението и вечерва да излезе на улица за да се спречи нов обид за воен удар.