Претседателот на Германија, Франк-Валтер Штајнмајер, во денешното обраќање на германски и на полски јазик во Вилун, побара прошка за полските жртви од германската тиранија во Втората светска војна.
„Се поклонувам на жртвите од нападот во Вилун, им се поклонувам на полските жртви од германската тиранија и барам прошка“, истакна Штајнмајер на комеморацијата во полскиот град Вилун по повод 80-годишнината од почетокот на Втора светска војна.
Тој упати и благодарност до Полска за „пружената рака во знак на простување“.
„Како претседател на Германија сакам да ве уверам дека ние никогаш нема да заборавиме, секогаш ќе паметиме и сакаме да паметиме и да преземаме одговорност што ја наметнува нашата историја“, посочи Штајмајер.
Штајнмајер и неговиот полски колега Анджеј Дуда утрово ја почнаа комеморацијата по повод 80-годишнината од почетокот на Втора светска војна. Церемонијата почна во полскиот град Вилун утрово во 04:40 часот, кога првите нацистички бомби паднаа на Полска и загинаа првите цивили. По едноминутното молчење, Дуда му се заблагодари на Штајнмајер за неговото присуство.
Подоцна, премиерот на Полска, Матеуш Моравијецки и европскиот претставник Франс Тимерманс ја одбележаа годишнината на полуостровот Вестерплате, каде се случи првата битка од Втората светска војна. На главниот настан во Варшава е најавено присуство и на германската канцеларка Ангела Меркел, потпретседателот на САД, Мајк Пенс и други.