Со воодушевување и стравопочит, германските медиуми пишуваат за Новак Ѓоковиќ кој вчера по осми пат во кариерата го освои трофејот на Австралија опен. Тој во финалето, по речиси четири часа, го порази петтиот носител Доминик Тим од Австрија со 6:4, 4:6, 2:6, 6:3, 6:4 и ја одбрани титулчата во Мелбурн.
„Ѓоковиќ веројатно е најголемиот индивидуалист во овој спорт. И затоа е така тешко да се победи против него, па дури и некој да е така блиску до такво нешто како што беше Тим“, коментираат медиумите во Германија.
Победата во финалето за Ѓоковиќ значеше и враќање на врвот на АТП листата кој до почетокот на гренслемот го држеше Рафаел Надал.
„Неговиот престол се тресеше, но „кралот“ на Австралија опен успеа да ги одбие нападите и да слави во своето осмо финале на централниот терен во Мелбурн парк. По негативата со 1:2 во сетови, 32 годишниот српски тенисер на крајот, сепак, триумфира во мечот што на моменти покажа највисоко ниво на тенис“, објави германската НТВ на својата интернет страница.
Австриецот Тим, пак, загуби во третото гренслем финале во кариерата, прво на Австралија опен и сè уште е без трофеј на турнирите од т.н. „голема четворка“.
За драматичната победа со пресврт напироко пишува и германскиот портал „Спорт1“.
„Престолот на Ѓоковиќ се тресеше и се чинеше дека „бунтот“ на Доминик Тим може да биде успешен, меѓутоа „кралот“ на крајот со големи напори успеа да го сочува „кралството“. Низ пет, неизвесни и, на моменти, квалитетни сетови, бранителот на титулата и рекордер по бројот на победи на Австралија опен, Новак Ѓоковиќ успеа да извлече глава од јамката“, пишува „Спорт 1“.
Првата победа во Мелбурн, Ѓоковиќ ја забележа во 2008 година по што ја покоруваше конкуренцијата и во 2011 година, во 2012 година, во 2013 година, во 2015 година, во 2016 година и лани.
„Голема група на навивачи се собра пред големото плато во паркот пред арената. Најголем дел од навивачите беа во црвени и сини маички, а грбот на некои беше прекриен со српски знамиња. Публиката ретко го прифаќа Ѓоковиќ така топло и беше наклонета како кон Федерер и Надал, но ако тој некаде има свои верни навивачи, тоа е во Австралија, иселеничка дестинација на другиот крај на светот“, наведува угледниот германски весник „Зидојче Цајтунг“.
Опишувајќи го мечот, весникот нагласува дека „тешко може некој да го победи Ѓоковиќ на тој стадион кој е негова тврдина“. Кога Тим го нарече крал на Мелбурн, веројатно имаше добра причина за тоа, пишува „Зидојче Цајтунг“ и потенцира дека Србинот, кој досега собра 17 гренслем титули, нема пораз во финале на Австралија опен.
Неделникот „Шпигел“ во своето издание го нарекува Ѓоковиќ „неромантичен идеалист“.
„Новак Ѓоковиќ е класа за себе во неговиот спорт. Во четвртиот сет од финалето, тој покажа зошто е толку тешко да се победи“, коментира авторот на текстот во „Шпигел“.
Притоа додава дека „се било како секогаш“. Кога официјалниот спикер на стадионот објави дека се гласа за најомилениот играч на турнирот, најмногу гласови доби Тим, чувство што е одлично познато на Ѓоковиќ. За српскиот тенисер се вели дека е ретко омилен, меѓу другото бидејќи и на теренот делува како некој неромантичен идеалист. Но, толку тоа е што го прави така успешен“.