Македонскиот фудбалски репрезентативец, Елиф Елмас и официјално е нов член на Наполи. Тој, претпладнево, ги мина лекарските прегледи кај наполитанците и се стави на располагање на менаџерот Карло Анчелоти. Успешно завршениот трансфер го потврди и самиот преку социјалните мрежи на кои постира фотографија во опрема на „небесно-сините“ од „Сан Паоло“.
„Нов предизвик. Наполи“, напиша Елмас крај фотографијата што ја објави на Фејсбук.
Елмас се пресели во Наполи од екипата на Фенербахче во која замина во 2017 година од Работнички по настапите со младата македонска репрезентација на Европското првенство во Полска. Детали за договорот сè уште нема, но информациите што ги пласираа турските медиуми во изминатиот период се дека офанзивниот фудбалер ќе остане на Апенините во наредните четири години во трансфер, неофицијално, вреден 16 милиони евра плус бонуси.
Во трка за потписот на Елмас беа голем број на клубови во Европа, но македонскиот репрезентативец се одлучил за Наполи од две причини. Првата е дека ќе работи со Карло Анчелоти, а втората е дека ќе игра во Лигата на шампиони.