Македонија со победа ги започна настапите во УЕФА Лигата на нации. „Црвено-жолтите“ се оправдаа како фаворити и рутински го совладаа Гибралтар со 2:0 во воведниот меч во групата 4 во Д конкуренцијата. Победникот на стадионот „Викторија“ беше решен уште во првото полувреме со головите на Иван Тричковски во 19-та минута и на Езџан Алиоски во 35-та минута.
Избраниците на Игор Ангеловски доминираа во текот на сите 90 минути и по деветти пат во низа завршија како непоразени. Имаа целосна контрола на теренот и не дозволија ниту трошка надеж на домашните да се понадеваат на можно изненадување. Голманот Столе Димитриевски вечерва остана без работа, Горан Пандев одигра едно полувреме и на паузата остана во соблекувална, откако работата беше очигледно дека е завршена по пола час игра.
Јасна беше определбата на селекторот да не ризикува со евентуална повреда или, пак, да го троши капитенот пред неделниот меч со Ерменија во Скопје. Нешто подоцна од игра ги повлече и Александар Трајковски и Енис Барди, па минутажа во вториот дел добија Илија Несторовски, Елиф Елмас и Егзон Бејтулаи во мечот што дојде како посилен тренинг за македонската фудбалска репрезентација.
Во вториот меч во групата, Ерменија во Ереван славеше над Лихтенштајн со 2:1. Ерменците со нам добро познатите Хенрик Мкитарјан, поранешниот вардарец Хофханес Хамбарѕумјан и сè уште актуелниот член на „црвено-црните“, Тигран Барсегјан во недела од 18 часот ќе гостуваат на националната арена „Филип Втори“ во Скопје.
Лига на нации
А лига
Група 1: Германија – Франција 0:0
Б лига
Група 1: Чешка – Украина 1:2
Група 4: Велс – Република Ирска 4:1
Ц лига
Група 3: Норвешка – Кипар 2:0, Словенија – Бугарија 1:2
Д лига
Група 1: Летонија – Андора 0:0, Казахстан – Грузија 0:2
Група 4: Гибралтар – Македонија 0:2, Ерменија – Лихтенштајн 2:1