Никола Глигоров (34) во четвртокот во Истанбул го постигна, можеби, најдрагиот гол, ако не и најдраг во кариерата што вечно ќе го памети. Тивкиот работник на теренот, но и надвор од него, му пресуди на Фенербахче во судиското надополнување на реваншот плеј-офот за печат на „црвено-црната“ мисија наречена групна фаза во УЕФА Европа лигата. По двете (не)проспиени ноќи од историската вечер за македонскиот клупски фудбал на Босфорот излезе со свој коментар за ждрепката, за противници во групата Л и што може, а што не, да се очекува од 14 септември до 7 декември на меѓународната сцена.
„Добивме атрактивни противници. Зенит, на пример, е редовен учесник во групите во Лигата на шампиони во секоја сезона и секој пат претендира на пласман во нокаут фазите. Тука е Реал Сосиедад, екипа што тешко ја добиваат и Барселона и Реал Мадрид на нејзината „Аноета“. И, секако, Розенборг кој до групите стигна преку Ајакс кој играше финале во минатата сезона. Сето ова доволно говори за квалитетот на нашите ривали. Не сакаме да си наметнуваме цели во Европа. Дебитанти сме и немаме право никому да се закануваме. Она што можеме да ветиме е беспоштедна борба во секој меч“, коментира Глигоров.
Уживање во успехот, гордост, среќа, задоволство, полно срце. Еуфоријата на вардарци, сепак, ќе мора да биде со ограничен рок на важност бидејќи Зенит ќе дојде за нешто повеќе од две недели. Во меѓувреме ќе имаат првенствени настапи и репрезентативни подготовки, а притоа треба да се остане на земја.
„Нема зборови што за опис на чувството што го имаме. Мило ми е што го дигнавме градот на нозе, што до нас допираат позитивни критики и позитивна енергија што ја чувствуваме на секој чекор. Успехот не е случаен. Ваков успех не се гради преку ноќ, ова што го направивме е резултат на три ипол годишна работа. Заслуги имаат сите во клубот, од економот до сопственикот без чија поддршка немаше да бидеме каде што сме. И Чеде Јаневски направи фантастична работа, да не речам чудо. За само два дена нè подготви, пред се на психолошки план. Неверојатно“, истакна Глигоров во свое лично име и во име на соиграчите.
Вардар викендот е без првенствени обврски. Поради настапите во УЕФА Европа лигата, шампионот се обрати со барање до Работнички за одложување на дуелот од третото коло што беше закажан за утре (недела), на што соседот од Градски парк одговори позитивно. Терминот за одигрување на средбата ќе биде дополнително утврден.