Јапонското Министерство за телекомуникации денеска казни 32 вработени, бидејќи го прекршиле етичкиот кодекс и дозволиле да им бидат плаќани скапи вечери. Скандалот беше обелоденет во февруари, откако вработени во сателитскиот емитер „Тохокушинша Филм“, меѓу кои и синот на премиерот Јошихаде Суга, Сеиго, честеле претставници на Министерството за телекомуникации.
Сличен настан се случил и подоцна, со претставниците на телекомуникацискиот гигант НТТ.
Независно тело на јапонското Министерство за телекомуникации во март покрена внатрешна истрага за да утврди дали честењето на вработени во Министерството за телекомуникации влијаело на издавање на лиценците за емитување.
Од 32 вработени, против девет се покренати дисциплински мерки, а на петмина од нив им е одбиено од плата, а останатите 23 службеници добиле само укор, меѓу кои и заменик министерот Буичира Куроду.
Министерот за внатрешни прашања и комуникации Рјота Такеда доброволно се откажа од платата во рок од три месеци и јавно се извини бидејќи „ја изневери довербата на јавноста во Владата“.
И „Тохокушинша Филм“ спроведе своја истрага и потврди дека во периодот од ноември во 2015 година до декември во 2020 година имало 54 случаи кога биле честени со скапи вечери претставници на Министерството, а Сеиго Суга присуствувал на 22.