Новак Ѓоковиќ е свесен за поразот во четвртфиналето во Париз и можните последици, го прифаќа и нагласи потреба од извлекување на поуки. Признава дека недостасувал квалитет во неговиот тенис, дека Чилиќ бил подобар и заслужено победил.
„Имав моменти во кои играв добро, но и многу осцилации поради недостаток на психолошка свежина во важните моменти. Тоа е последица на врвното ниво од последните неколку години што ме исполнуваше и ми причинуваше задоволство, но и ме исцрпи. Недостасуваше континуитет во играта за што сум свесен. Составен дел е од мојот живот и кариера“, рече Ѓоковиќ по елиминацијата од Чилиќ.
Хрватскиот тенисер славеше со 6:4, 7:6 и го оневозможи Ѓоковиќ да го брани тронот во Париз. И првото место на АТП листата е сега загрозено, но не е загубено. Ќе биде ако Мареј се пласира во финале за што му треба победа, најпрво, против Чехот Томаш Бердих, а потоа и над подобриот од мечот меѓу Цонга и Раониќ.
„Свесен сум дека останатите тенисери минуваат многу време во анализи на мојата игра и бараат начин како да ме победат кога сум во привилегирана позиција. Таа од тој аспект е неблагодарна бидејќи дополнително ги мотивира противниците. Ми преостанува да гледам напред, да го прифатам ова што се случи и да извлечам поуки“, коментира српскиот тениски ас.
Ѓоковиќ признава дека ппо промените што му се случија во приватниот живот не е истата личност од пред неколку години.
„Останав на турот, играм тенис, имам амбиции што се врзани за највисоки цели во нашиот спорт. Натпреварите на грендслем турнирите предизвикуваат најголема мотивација. Имам многу работи што сакам да ги постигнам, но свесен дека е неможно да се реализираат ако немам квалитет во играта, континуитет и психолошка свежина. Моментно работам на нив и ако успеам да воспоставам рамнотежа и да се организирам себеси и мојот живот, убеден сум дека нештата ќе одат на подобро“, истакна сè уште водечкиот на АТП листата и во тој контекст продолжи:
„Со причина сум во ваква ситуација. Свесен сум исто така дека не може постојано да победувам. Тоа е некој вид на транзиција во животот на спортистите, каде имам прилика да се издигнам на повисоко ниво, да видам што значи иднината за мене како тенисер и човек. На 17 -18 години имав поинакви амбиции и визии отколку сега и во рамки на нив мора да се прилагодам“.
Освојувачот на 12 гренслем титули од кои шест на Австралија опен, три на Вимблдон, две на Ју-Ес опен и една на Ролан Гарос наведе дека тенисот е голем дел од неговиот живот, но и дека не му е се.
„Приоритет? – Постојат разлики меѓу животните и тениските. Тенисот не ми е се во животот. Приоритет ми е да бидам среќен, да имам мир, да бидам исполнет со радост, среќа и љубов од најблиските. Потоа доаѓа тенисот кој сочинува поголем дел од мојот живот, нешто што ме радува и се додека имам инспирација да играм и додека го следам текот на турот ќе бидам каде што и сум во моментот“, е порака што Ѓоковиќ ја испрати од „Берси“ во Париз.
На крај заклучи дека Роже Федерер и Рафаел Надал влијаеле на него како тенисер.
„Влијаеја на мое оформување како тенисер, но не и како личности. Јас сум свој човек. Напредував низ мечевите со нив, извлекував поуки, поради нив станав ментално силен и способен за натпревари на највисоко ниво долги години бидејќи поставија високи стандарди. Тие се поинакви луѓе, со поинакви визии во животот. Морам да се оградам од тоа. Јас имам свој правец“, заврши Ѓоковиќ.