Вимблдон беше пресвртница во ланската сезона на Новак Ѓоковиќ. Освоената титула на гренслемот во Лондон всушност значеше враќање на српскиот тенисер кон врвот на АТП листата по забележаниот пад на рејтингот поради повреди. Подоцна ја покори конкуренцијата и во Њујорк (Ју-Ес опен), на почетокот на оваа сезона и на Австралија опен, а утре се враќа на неофицијалното светско тениско првенство како најдобар планетарен рекет.
„Има доста голема разлика. Минатата година излегов од топ 20 по Ролан Гарос. Резултатите не беа константни по операцијата што ја имав. Успехот на Вимблдон беше отскочна даска за мене и ми донесе огромно олеснување. Потоа се тргна нагоре. Го освоив Синсинати за првпат, а потоа и Ју Ес Опен. Гренслем титула може да промени сечија кариера. Дури по 15. гренслем титули во мојата колекција, јас сè уште ги ценам овие турнири и успехот во нив ми е особено важен за мене, мојата кариера, мојата доверба и мојата иднина“, истакна Ѓоковиќ.
Признава дека Вимблдон останува посебно место за него. Четири пати досега заминуваше од Лондон со престижниот пехар и од 1 до 14 јули ќе атакува на петта победа по 2011 година, 2014 година, 2015 година и по 2018 година. Негов прв ривал во мисијата за одбрана на титулата е Германецот Филип Колшрајбер.
„Тревата е историската подлога. Најтрадиционална. Овој турнир е свет за тенискиот спорт. Затоа овде се чувствувате посебно“, порача водечкиот светски тенисер.
Србинот е свесен дека нема да биде лесно. Истакнува дека во денешно време нема лесни мечеви и ниту еден противник не е лесен за надминување и прогрес на големите турнири што се мотив за сите. Оваа година веќе има едно непријатно искуство со Колшрајбер, па затоа е фокусиран да не дозволи нов шок.
„Колку сте поефикасни во првата недела, толку подобро за втората на турнирот. Треба да сте максимално концентрирани за да победите во три сета против Колшрајбер кој е многу добар на трева и ме победи оваа година во Индијан Велс“, додава Ѓоковиќ.
Ѓоковиќ лани ја освои четвртата титула на Вимблдон по победата во финалето на Кевин Андерсон со 6:2, 6:2, 7:6. Трофејот во женска конкуренција го брани Германката Анџелика Кербер која во минатогодишното финале ја порази Серена Вилијамс со 6.3, 6:3.