Новак Ѓоковиќ се опиша дека минува низ период на транзиција, а дефинитивната одлука за новиот тренер ќе биде позната за три до четири недели. Српскиот тениски ас неодамна ја раскина соработката со целокупниот стручен штаб на чело со Маријан Вајда и соработниците во новиот ги најави по завршување на Ролан Гарос.
„Се што досега направив ме прави да бидам горд. Време е да тргнам натаму. Не беше мала и лесна одлуката за разделба со стручниот штаб, но почувствував дека се потребни промени. Мал број на тенисери работат со ист тим 10 години. Амбициите и целите остануваат исти. Нема да одам на турнири колку да одиграм туку ќе одам да се борам и освојувам трофеи. Вербата во себе не ме напушти“, изјави Ѓоковиќ за интернет страницата на Асоцијацијата на тениски професионалци (АТП).
Меѓу оние малку тенисери што имале ист тим со години е случај и со Ѓоковиќ. Во кариерата соработувал со осум тренери. Почетоците се врзани за Јелена Генчиќ (1993-1999 година) по што следуваа договори со Никола Пилиќ (1999-2003), Дејан Петровиќ (2004-2005), Рикардо Пјати (2005-2006), Маријан Вајда (2006-2017), Марк Вудфорд, Тод Мартин (2009-2010) и Борис Бекер (2013-2016).
„Да треба да го опишам мојот статус со еден збор, тоа би била транзиција. По една деценија дојдов до заклучок дека е момент за промени да тргнам напред. Од почетокот на кариерата напредував до успех, играв на високо ниво, а по Ролан Гарос не знаев што и како да чувствувам. Никогаш, сепак, немав проблеми со мотивација“, додаде Ѓоковиќ.
Вести за новиот тренер не сподели со јавноста иако низ кулоарите се врти Андре Агаси како потенцијален наследник на Маријан Вајда.
„Засега нема ништо ново. Верувам дека имате разбирање за ситуацијата. Ми треба време да размислам и во наредните три до четири недели ќе знам се“, заклучи поранешниот прв светски рекет кој моментно се подготвува за настап на Мастерсот во Рим.