Презадоволство во Вардар од победничкиот почеток на одбрана на титулата во ракометната Лига на шампиони. Првенствено од значењето дека е забележан на гости, а потоа и на терен што важи за тешко освоив за противнички екипи. „Црвено-црните“ во воведниот дуел во групата ја совладаа Висла во Плоцк со 26:22 (13:9) за нивна прва радост во настапите на Полска.
„Во Плоцк тешко се освојуваат бодови. Ние успеавме и среќен сум поради тоа. Висла има добар ростер што е предводен од одличен тренер. Одигравме добра одбрана и мислам дека тоа ја направи разликата. Противникот имаше добри петнаесетина минути во вториот дел, период во кој ни ссоздаде доста проблеми, но успеавме да се консолидираме и победиме и покрај големиот број промашени зицери“, истакна вардаровиот тренер, Раул Гонзалез.
Македонскиот и европски првак ја имаше контролата во текот на целиот меч. Висла само трипати успеа да израмни, но ниту еднаш и да поведе во 60. минути во својата „Орлен арена“ што е доволен податок за отсликување на односот на силите на терен. Првото беше во четвртата минута преку Тарабохија за 1:1, второто преку Обрадовиќ во 36 минута за 13:13, а последното преку Дуарте во 44. минута за 15:15 на што вардарци возвраќаа со серија од два до три гола.
„Висла имаше свои моменти. Особено во второто полувреме. Одиграа добро по паузата, но, сепак, на крај заслужено победивме. Важен триумф, важни бодови за нас. Во Плоцк ќе биде тешко за сите екипи во групата. Не само за игра туку и за победа. Ние успеавме“, истакна Иван Чупиќ по продолжување на вардаровата низа на шест победи вклучувајќи го и финишот на ланската сезона.
Домашниот ракометар Даѓек беше најефикасен на средбата со шест гола, Борозан го предводеше Вардар со пет погодоци. Во останатите мечеви во групата А, Нант на Кире Лазаров го порази ПИК Сегед со 30:26 додека победник немаше во двата останати меча Рајн Некар Левен – Барселона (31:31) и Кристијанштад – ППД Загреб (28:28).
Вардарци во второто коло (23 септември, 17,30 часот) ќе бидат домаќини на Нант.
Висла Плоцк – Вардар 22:26 (9:13)
Сала: „Орлен арена“ во Плоцк. Гледачи: 4,750. Судии: Оскар Ралуј Лопез и Ангел Сабросо Рамирез (двајцата од Шпанија)
Висла Плоцк: Вихари, Моравски, Борбели, Дашек 6, Дуарте 1, Крајевски 3, Обрадовиќ, Гонеа, Т. Гебала, Ивиќ 4, Тарабохија 3, М. Гебала, Забиќ 1, Михиќ, Де Толедо 4, Воловјец. Тренер: Пјотр Пржибецки.
Седмерци: 3/3. Исклучувања: 10 минути.
Вардар: Штербик, Ѓорѓески, Стоилов 2, Кристопанс 4, Фереита Мораеш, Македа 1, Карачиќ 2, Абутовиќ, Кањелјас 2, Циндриќ 2, Чупиќ 3, Дибиров 3, Шишкарев 2, Борозан 5, Војводиќ, Марсениќ. Тренер: Раул Гонзалез.
Седмерци: 2/3. Исклучувања: 10 минути
Лига на шампиони (м) – 1 коло
Група А
Висла Плоцк – Вардар 22:26
Нант – ПИК Сегед 30:26
Рајн Некар Левен – Барселона 31:31
Кристијанштад – ППД Загреб 28:28
Група Б
Кил – ПСЖ 22:25
Фленсбург – Алборг 30:27
Целје – Веспрем 31:39
Мешков Брест – Виве Кјелце 28:25
Група Ц
Горење Велење – Адемар Леон 23:22
Скјерн – Динамо Букурешт 39:28
Шафхаузен – Елверум 36:30
Група Д
Бешикташ – Спортинг Лисабон 26:30
Монпелје – Металург 32:22
Мотор Запорожје – Чеховски медведи 36:23