Македонија, конечно, го доби првиот свој претставник во групна фаза во европско клупско фудбалско друштво. Вардар ќе биде дел од утрешната ждрепка за главната фаза во Лига Европа по вечерашниoт триумф со 2:1 против Фенербахче на „Шукру Сарачоглу“ во Истанбул во плеј-оф реваншот за второто по ранг натпреварување на УЕФА.

Голот за реализација на фудбалски сон на целокупната домашна јавност беше дело на Грузиецот Џамбул Џигаури во 68 минута како одговор на водечкиот на Нојштатер во 61., но и за празнење на трибините на стадионот на Фенербахче. Точка на историскиот сон стави Никола Глигоров во првата минута од судиското продолжение.

Со ова продолжија и убавите спомени за македонските клубови во европските пресметки со турските. Победа во 2001 година го елиминира Ризеспор во тогашниот Интер-тото куп, Работнички во 2015 година со голот на Кире Маркоски го исфрли Трабзонспор во рамки на Европа лигата за традицијата да кулминира со големиот успех на Вардар во двомечот со Фенербахче.

Влез со златни букви во македонската клупска фудбалска историја вечерва обезбедија Филип Гачевски, Џамбул Џигаури, Стефан Спировски, Дејан Блажевски, Тигран Барсегјан, Дарко Велковски, Ховханес Хамбарѕумјан, Бобан Николов, Јевгени Новак, Хуан Фелипе, Владица Брдаровски, Игор Алексовски, Висар Мислиу, Дамир Којашевиќ, Никола Глигоров, Бесир Демири, Дарко Глишиќ, Итало Хозе Оливеира дош Сантош. И, секако, Чедомир Јаневски кој ја презеде екипата на два дена пред првиот дуел со Фенербахче.

Фенербахче – Вардар 1:2 (0:0)

Стадион: „Шукру Сарачоглу“ во Истанбул. Гледачи: 30.000. Гл. судија: Даниел Стефански. Асистенти: Марсин Бониек и Давид Игор Голис (сите тројца од Полска). Ж. картони: Нојштатер (Фенербахче). Стрелци: Нојштатер 61′ за Фенербахче; Џигаури 68′, Глигоров 90’+1′ за Вардар.

Фенербахче (формација 4-4-2): Камени – Којбаши, Шкртел, Нојштатер, Исла – Валбуена, Топал (Косе 75′), Туфан, Дирар – Потук (Чахечухе 44′), Ван Перси (Солдадо 58′). Менаџер: Ајкут Кочаман.

Вардар (формација: 4-2-3-1): Гачевски – Брдаровски, Велковски (Глигоров 73′), Новак, Хамбарѕумјан – Спировски, Николов – Блажевски (Муслиу 62′), Џигаури (Којашевиќ 84′), Фелипе – Барсеган. Менаџер: Чедомир Јаневски.