Градоначалничката на Скопје, Данела Арсовска го стопира меѓународниот тендер за изградба на БРТ во главниот град. Образложението на одлуката е дека проектот ќе трае предолго и оти на метрополата ѝ се неопходни брзи и ефикасни решенија во делот на јавниот превоз, но и оти во проектот БРТ се регистрирани недостатоци и ризици по животната средина.
Самата траса на БРТ на булеварот Партизански одреди минува над главната водоводна цевка за снабдување со вода на Скопје, што само по себе претставува ризик кој може да донесе големи проблеми за самиот град. Покрај тоа, доколку се реализира БРТ, градот ќе остане без голем број дрвја и зеленило, што секако лошо ќе влијае на животната средина, велат од Град Скопје од каде додаваат дека затоа и нема пристигнато понуди.
Проектот БРТ во Скопје беше причина за денешните препукувања меѓу власта и опозицијата. Стопирањето на тендерот, за кој со ЕБОР беше потпишан договор за кредит во износ од 70 милиони евра, за СДСМ е скандалозно.
Направени се истражувањата и изработка на студијата на која учествуваа сообраќајни експерти од земјава и странство, како и проект за првата траса. Беше потпишан и Договор со ЕБОР за наменски кредит од 70 милиони евра за изградба на двете траси на БРТ системот. Сега, заради лични хирови, Арсовска го укинува овој проект кој што веќе е во процес на реализација и од висок интерес на скопјани, изјави Стефан Васев од владеачката СДСМ.
За ВМРО-ДПМНЕ, пак, проектот бил наметнат нетранспарентно, со големи сомнежи за корупција, без јавна дебата, а тендерот бил објавен непосредно пред изборите. Од таму тврдат дека БРТ требало да се спроведе за 10 години и го делат ставот на Град Скопје дека на метрополата ѝ гтребаат брзи и ефикасни трешенија за јавниот превоз.
Проектот БРТ се однесува на автобуско метро или превоз независен од останатиот сообраќај, кој беше претставен од поранешниот градоначалник Петре Шилегов како екстра брз, навремен и целосно еколошки систем кој е планиран во две траси, а зеленилото е предвидено да се дуплира, според она што тој го најави. Сега, со негово стопирање, се поништуваат уште два проекта – едниот за оптимизирање на градските линии, а другиот за одржливост на јавниот превоз, проекти тешки над милион евра.