Граѓаните што имаат квалификации, знаење, па и желба да станат директори, сега имаат шанса да се обидат да го постигнат тоа. Град Скопје распиша јавен конкурс за избор на директори на шест јавни претпријатија од вкупно осум кои се во надлежност на градот. Оттаму велат дека ова се прави во согласност со законските прописи, кои меѓу другото пропишуваат дека функцијата вршител на должност, односно в.д. директор може да се извршува најдолго шест месеци.
Во моментов во тек се конкурси за избор на директори на јавните претпријатија „Градски паркинг“, „Паркови и зеленило“, „Улици и патишта“, „Водовод и канализација“, „Дрисла“ и „Лајка“. Нивните в.д. директори беа назначени во текот на декември минатата година, со исклучок на првиот човек на „Градски паркинг“ Бојан Христовски, кој беше именуван кон средината на јануари годинава, што значи дека мандатот им е при крај. Но, на крајот на декември градоначалничката Данела Арсовска го назначи за в.д. и директорот на „Комунална хигиена“, Зуди Енузи Кока, но за ова претпријатие не е распишан јавен конкурс, иако до истекот на неговиот мандат има уште еден месец. Од Градот не одговараат зошто ова претпријатие е исклучено од процедурата. Пред дваесетина дена пак, ЈСП „Скопје“ доби нов в.д. директор, втор по ред во мандатот на Арсовска, Александар Стојковски, на кој функцијата му е уште „тазе“, па веројатно за ова претпријатие јавен конкурс ќе има на есен.
Јавните конкурси за избор на директор во јавните претпријатија се објавуваат во согласност со член 19-а и член 23 од Законот за јавните претпријатија. На јавниот конкурс за избор на директор може да аплицира секој кандидат што ги исполнува условите наведени во конкурсот. Назначувањето на в.д. директор согласно Законот за јавните претпријатија, не може да трае повеќе од 6 месеци. Кога директорот е избран на јавното претпријатие, мандатот му трае 4 години – одговараат од Град Скопје.
Во објавените конкурси, кои траат до 15 јуни, се прецизирани и условите што треба да ги исполнат заинтересираните кандидати какви што се државјанство, соодветно образование, петгодишно работно искуство, меѓународен сертификат за активно познавање англиски јазик, а со овие документи мора да се достави и предлог програма за работа и развој на претпријатието за чие директорско место се аплицира.