Од Град Скопје и денеска нема да го коментираат настанот поврзан со обвинувањата од Коалицијата „Менуваме“ за дискриминација во врска со лице со посебни потреби на кое му било забрането да влезе во автобус на ЈСП Скопје, бидејќи било придружувано од сервис куче.
За ова, како што појаснуваат од Град Скопје, реакција вчера имале од ЈСП Скопје, и упатуваат на нивното соопштение. Од СДСМ денеска соопштија дека „срамна и дискриминирачка е постапката на Град Скопје и Арсовска да им се забрани влез на лица со попреченост кои се со придружба на куче“.
Од ЈСП Скопје вчера информираа дека градскиот превоз е за сите граѓани и нема одлука за некаква дискриминација.
– На ниту еден граѓанин не му е ускратено правото за јавен градски превоз. Јавното сообраќајно претпријатие Скопје е јавен сервис кој обезбедува градски превоз за сите граѓани и никогаш немало дискриминација. Нема никаква поинаква одлука од онаа донесена пред две години каде се овозможува лицата со попреченост кои имаат куче сервис да може да го користат јавниот превоз, соопшти ЈСП Скопје како одговор на реакцијата од Коалицијата „Менуваме“ .
Оттаму додаваат:
– ЈСП во соработка со Град Скопје веќе започна сеопфатна програма за подобрување на условите за превоз во јавниот сообраќај за лицата со попреченост преку поставување ниски платформи за лица со попречености, со што јавниот превоз би станал подостапен за истите, категоришни се од ЈСП Скопје од каде нагласија дека „како јавно претпријатие отворени сме за средба со Александар Велески за да ги презентираме нашите планови кои вклучуваат подостапен јавен превоз за лицата со попреченост. ЈСП Скопје и новата градска администрација веќе работат на промените кои ќе донесат подобро за скопјани преку јавен градски превоз што во вистинска смисла значи превоз за сите граѓани“.
СДСМ: Срамна и дискириминирачка е постапката на Град Скопје и Арсовска да им се забрани влез на лица со попреченост кои се со придружба на куче
Од СДСМ денеска соопштија дека „срамна и дискириминирачка е постапката на Град Скопје и Арсовска да им се забрани влез на лица со попреченост кои се со придружба на куче“,
– Скандалозен и дискриминирачки е вчерашниот настан каде во автобус на ЈСП Скопје му бил забранет влез на лице со попреченост кое било придружувано од неговото сервис куче.
Тоа е спротивно на Уставот, на законите и на Конвенцијата на Обединетите нации за права на лицата со хендикеп и СДСМ го осудува – додаваат од СДСМ од каде очекуваат одговорност за оваа срамна и дискриминирачка постапка.