Општина Кавадарци дава целосна поддршка за отварање мали групни домови  на нивна територија. Одлуката ја соопшти градоначалникот на Квадарци Митко Јанчев.

„Во изминатите денови сме сведоци на протести во селото Тимјаник поради одлуката на Министерството за труд и социјална политика за оспособување простор за мал групен дом за деца со попреченост во развојот. Општина Кавадарци дава целосна поддршка за отворање на мали групни домови. Отворени сме за соработка со Министерството за труд и социјална политика со сите ресурси кои ги има на располагање Општина Кавадарци, пишува градоначалникот Митко Јанчев, кој додава дека „секое дете заслужува безгрижно детство , да расте во средина која нуди добри услови и секое дете има право на грижа и топла прегратка“.

По протестите во Тимјаник, синоќа се обрати и градоначалникот на Валандово Перо Костадинов кој рече дека  Општината е подготвена да отстапи простор за лицата со попреченост.

„Општина Валандово е подготвена да отстапи простор и да создава услови за хумани дневни центри за лицата со попреченост кои заслужуваат еднакви шанси“ рече Костадинов.

Вчера жителите на Тимјаник каде што се отвори дом за мала група на деца со посебни потреби, протесетираа со барање домот да се дислоцира.

Жители на неготински Тимјаник, тврдејќи дека се загрижени за безбедноста на своите деца, се противат четири деца со интелектуална попреченост да бидат смесетени во новиот мал групен дом.

„Нема да дозволиме Тимјаник да стане Демир Капија. Нашите деца од нормални, ќе станат нездрави! Да си го повлечете проектот!“, извикуваа жителите на Тимјаник.

Министерката за труд Царовска рече  дека во  домот децата ќе имаат 24 часовна нега и грижа од цел тим и дека овие деца не можат да наштетат никому.

Овој процес на ресоцијализација што започнува годинава треба да заврши за две до три години. Центарот во Неготино и тој во Тимјаник се дел од проектот за деинституционализација на штитениците од Заводот во Демир Капија каде има вкупно 216 лица. Со проектот е предвидено за две до три години сите тие да бидат ресоцијализирани и вклучени во општеството, а не во големи, безлични и сегрегирачки институции. Тој е поддржан од УНИЦЕФ, УНДП и од Европската Унија.

Во Демир Капија може да остане само еден медицински дел за најтешките случаи.