Народниот правобранител Насер Зибери ќе предложи измени на регулативата за испорака на електрична енергија во делот на обврската за отчитувањето на броилата, откако голем број граѓани се пожалиле дека добиваат високи сметки за струја која не ја потрошиле, а ЕВН им наплатува авансно.

Од Канцеларијата на Народниот правобранител најавуваат дека во наредниот период оваа иницијатива ќе има приоритет, а првиот чекор што планираат да го направат е предлогот да го достават до Регулаторната комисија.

Народниот правобранител вели дека граѓаните најчесто реагираат затоа што  еден месец плаќаат високи сметки, кои следниот месец им се намалуваат, но дека ваквата пракса им предизвикува стресови  затоа што потрошувачите авансно ја плаќаат потрошената електрична енергија. Некои семејства, пак, и не се во можност со оглед на ниските примања да ги плаќаат вака скроените сметки и затоа бараат секој месец да платат онолку колку што потрошиле.

Таков е случајот со наш сограѓанин кој вели дека летоска во месец август кога цело семејство било на летен одмор за струја платил над 3.000 денари, а веќе во наредниот месец му дошла сметка на која било извршено порамнување со сума од околу 500 денари. Тој, сепак очекува во иднина да не плаќа авансно затоа што тоа го оптеретува неговиот семеен буџет.

-Како што јас за мојата работа добивам плата месечно, така треба и ЕВН да ми наплатува за тоа што јас сум го потрошил во текот на месецот, не можам со месечната плата да подмирувам паушал во вредност од речиси две сметки за струја. Секогаш кога сум реагирал на нереалната сметка во ЕВН ме упатуваат на интернет да пријавувам колку киловат часови сум потрошил, но секако дека како потрошувач имам право да барам да се подобрат услугите при наплатата од ЕВН, вели нашиот соговорник.

Во врска со овие реакции на граѓаните, побаравме објаснување од ЕВН, од каде што велат дека и покрај тоа што со Законот за енергетика, Мрежни правила и Правила за снабдување е пропишано отчитувањето на броилата да се извршува еднаш годишно, екипите на Електродистрибуција тоа го прават секој месец.

– Но, се случува броилото да не се отчитува поради различни причини, корисникот е отсутен, не е дома или во објектот, поради спречување на екипите за отчитување од страна на корисникот, поради непристапност до мерното место, лоши временски услови, боледувања на отчитувачи, изолација поради коронавирусот, објаснуваат од компанијата.

Ако се случи да не е прочитано броилото, велат од ЕВН, за што се фактурира претпоставена вредност како просек од потрошувачката во последните 12 месеци, корисникот може да пријави состојби преку веб страната evnonline.mk, преку меил, телефонски и во приемните канцеларии на Корисничките енергоцентри на Електродистрибуција, при што нивните служби ќе ги направат соодветните корекции.

– Претпоставената фактура не значи по автоматизам повисока фактура за електрична енергија. Таа може да содржи и пониски претпоставени вредности на потрошувачка од реалната во тој месец, се вели во одговорот од ЕВН.
Исто така, повисока сметка од очекуваната може да се должи и на веќе направено порамнување по прочитана состојба, за која претходниот месец била испорачана претпоставена вредност пониска од тоа што било потрошено.

– ЕВН нема никогаш да наплати повеќе од она што корисникот го има потрошено. Ако не било возможно отчитување на броилото, со наредното отчитување ќе се порамни потрошувачката во зависност од тоа дали корисникот потрошил повеќе или помалку од последната состојба, велат од компанијата.

С.М.